بیدر، 22 جولائی (ایس او نیوز / ایجنسی):بی جے پی کے سینئر رہنما اور کرناٹک کے ایم ایل اے پربھو چوہان کے بیٹے پرتیک چوہان پر ایک نوجوان لڑکی نے شادی کا جھانسہ دے کر جنسی زیادتی کرنے کا سنگین الزام عائد کیا ہے۔ متاثرہ لڑکی نے بیدر پریس کلب میں پریس کانفرنس کر کے میڈیا کے سامنے فریاد کرتے ہوئے انصاف کی اپیل کی ہے اور اپنی جان کے تحفظ کے لیے پولیس سے سکیورٹی فراہم کرنے کا مطالبہ بھی کیا ہے۔

پریس کانفرنس سے خطاب کرتے ہوئے متاثرہ لڑکی نے کہا کہ پرتیک چوہان نے اس سے محبت اور شادی کے وعدے کیے، اس بنیاد پر اس نے جسمانی رشتہ قائم کیا، مگر بعد میں اس نے شادی سے انکار کر دیا۔ اس نے مزید کہا کہ "میں صرف پرتیک سے محبت کرتی تھی، کسی اور سے نہیں۔ مگر اب میرے کردار کو داغدار کرنے کی کوشش کی جا رہی ہے۔ جھوٹے اور ایڈٹ کیے گئے فوٹوز اور ویڈیو کالز کو پھیلایا جا رہا ہے تاکہ میری شبیہ کو خراب کیا جائے۔"

متاثرہ لڑکی نے سوال اٹھایا کہ اگر پرتیک چوہان بے قصور ہے تو وہ خود سامنے آ کر بیان کیوں نہیں دیتا؟ "آخر اس کے والد، ایم ایل اے پربھو چوہان ہی کیوں اس کی طرف سے وضاحت دے رہے ہیں؟" لڑکی کا کہنا ہے کہ چوہان خاندان کی طرف سے اسے اور اس کے گھر والوں کو جان سے مارنے کی دھمکیاں دی جا رہی ہیں۔

اس موقع پر متاثرہ لڑکی کے بھائی نے بھی میڈیا سے خطاب کرتے ہوئے الزام لگایا کہ پرتیک چوہان نے صرف ان کی بہن کے ساتھ نہیں بلکہ کئی دیگر لڑکیوں کے ساتھ بھی دھوکہ دہی کی ہے۔ انہوں نے کہا کہ ایک اور لڑکی بھی اسی قسم کی زیادتی کا شکار ہوئی ہے اور وہ بھی ان کے ساتھ کھڑی ہے۔ "یہ معاملہ صرف ہمارے خاندان کا نہیں، بلکہ کئی لڑکیوں کے مستقبل کا سوال ہے۔ لہٰذا حکومت اور پولیس کو فوری طور پر سخت کارروائی کرنی چاہیے۔"

متاثرہ لڑکی کی والدہ بھی پریس کانفرنس کے دوران موجود تھیں اور انہوں نے بھی بیٹی کے حق میں آواز بلند کی۔ لڑکی کے خاندان نے حکومت اور قانون نافذ کرنے والے اداروں سے اپیل کی ہے کہ وہ انصاف کی فراہمی کو یقینی بنائیں اور چوہان خاندان کے دباؤ سے انہیں محفوظ رکھا جائے۔