ریاض، 10/مئی (ایس او نیوز /ایجنسی) سعودی عرب کی وزارتِ حج و عمرہ نے ہجری سال 1447ھ کے لیے عمرہ کیلنڈر جاری کر دیا ہے۔ جاری کردہ کیلنڈر کے مطابق، نئے عمرہ سیزن میں غیر ملکی زائرین کی آمد 15 ذوالحجہ 1446ھ، یعنی 11 جون 2025 سے شروع ہوگی۔ کیلنڈر میں عمرہ ویزا کے اجرا کی اہم تاریخیں، غیر ملکی ایجنٹس کے ساتھ معاہدوں کی تفصیلات، اور بیرونِ مملکت سے آنے والے زائرین کے داخلے اور روانگی کی آخری تاریخیں بھی شامل ہیں۔
وزارت کے مطابق، عمرہ زائرین کے لیے ویزوں کے اجرا کا عمل 10 جون 2025 سے شروع ہوگا، جس کے بعد زائرین کی باضابطہ آمد 11 جون 2025 سے ہوگی۔ بیرونِ ملک زائرین کو خدمات فراہم کرنے والے غیر ملکی ایجنٹس کو اپنے معاہدوں کو 27 مئی 2025 تک حتمی شکل دینا ضروری ہوگا۔
واضح رہے کہ 25 مارچ کو نسک پلیٹ فارم اور عمرہ پاتھ سسٹم کے ذریعے ایکسٹرنل ایجنٹ کوالیفکیشن سروس کے آغاز کے ساتھ ہی نئے عمرہ سیزن کی تیاریاں شروع ہوچکی ہیں۔ عمرہ کمپنیوں اور ایکسٹرنل ایجنٹس کے درمیان معاہدوں پر دستخط کا عمل 14اپریل کو حج و عمرہ سروسیز فورم 2025 کے دوران شروع ہوا۔
سعودی حکومت کی جانب سے جاری کردہ کیلنڈر میں اہم آخری تاریخیں بھی شامل کی گئی ہیں۔ عمرہ ویزے جاری کرنے کی آخری تاریخ 20 مارچ 2026 مقرر کی گئی ہے، جبکہ زائرین کے مملکت میں داخلے کی آخری تاریخ 3 اپریل 2026 ہے۔ تمام عمرہ زائرین کو 18 اپریل 2026 تک مملکت سے روانہ ہونا ضروری ہوگا۔
اس کے علاوہ، وزارت نے بتایا کہ ایکسٹرنل ایجنٹ کوالیفکیشن کی درخواستوں کو قبول کرنے کا عمل یکم شعبان 1447ھ بمطابق 20 جنوری 2026 تک بند ہو جائے گا۔ واضح رہے کہ عمرہ کمپنیوں کے ساتھ ان کے معاہدوں کی منظوری کی آخری تاریخ بھی یہی مقرر کی گئی ہے۔ یہ ٹائم لائن سعودی وزارت کی اسٹریٹجک پلاننگ کا حصہ ہے جس کا مقصد ایک منظم عمرہ سیزن کو یقینی بنانا ہے تاکہ دنیا بھر سے آنے والے زائرین کیلئے خدمات میں بہتری لائی جائے۔