جے پور 8/مارچ (ایس او نیوز/ ایجنسی) جے پور کی خصوصی عدالت نے اجمیر بم دھماکہ سانحہ میں سوامی اسیمانند سمیت سات ملزمان کو آج بری کر دیا جبکہ  تین ملزمان کو اس معاملے میں قصوروار پایا ہے. قومی جانچ ایجنسی کے معاملات کی خصوصی عدالت کے جج دنیش گپتا نے اجمیر میں واقع صوفی سنت خواجہ معین الدین چشتی کی درگاہ کے احاطے میں 11 اکتوبر 2007 کوہوئے ایک بم دھماکہ کیس میں دویندر گپتا، بھاویش  پٹیل اور سنیل جوشی کو مجرم قرار دیا ہے.

اسیمانند پر حملے کی منصوبہ بندی کا الزام تھا. 11 اکتوبر 2007 کو ہوئے اس دھماکے میں تین لوگوں کی موت ہو گئی تھی اور تقریبا 20 افراد زخمی ہوئے تھے.

مدعا علیہان کے وکیل جگدیش ایس رانا نے بتایا کہ عدالت نے سوامی اسیمانند سمیت سات افراد کو شک کا فائدہ دیتے ہوئے بری کر دیا ہے. مجرم پائے گئے ملزمان میں سے سنیل جوشی کی موت ہو چکی ہے. عدالت دویندر گپتا اور بھویش پٹیل کو آئندہ 16 مارچ کو سزا سنائے گی.

انہوں نے بتایا کہ عدالت نے سوامی اسیمانند، ہرشد سولنکی، مکیش واسانی، لوکیش شرما، میہول کمار اور  بھرت بھائی کو شک کا فائدہ دیتے ہوئے بری کر دیا. انہوں نے بتایا کہ عدالت نے دویندر گپتا، بھاویش  پٹیل اور سنیل جوشی کو تعزیرات ہند کی دفعہ 120 بی، 195 اور دفعہ 295 کے علاوہ دھماکہ خیز مواد قانون کی دفعہ 3 (4) اور غیر قانونی سرگرمیوں کا مجرم پایا ہے.

اسیمانند بہت سے دوسرے بم دھماکے کے معاملے میں بھی ملزم ہیں جس میں حیدرآباد کی مکہ مسجد میں 2007 میں دھماکے اور اسی سال سمجھوتہ ایکسپریس دھماکے شامل ہیں  جس میں تقریبا 70 لوگوں کی موت ہو گئی تھی. سمجھوتہ ایکسپریس بھارت پاکستان کے درمیان چلتی ہے.

انہیں 2010 میں جیل بھیجا گیا جہاں انہوں نے دہشت گرد معاملات میں مبینہ طور پر اس کے کردار کو تسلیم کیا تھا. بعد میں انہوں نے کہا کہ تحقیقات حکام نے انہیں تشدد کا نشانہ کرکے جھوٹا بیان دلایا تھا.