نئی دہلی، 28؍اگست(ایس او نیوز/آئی این ایس انڈیا)وزیر اعظم نریندرمودی کی جانب سے بی جے پی کی حکمرانی والی ریاستوں کے لیے غریبوں کی فلا ح و بہبودکے ایجنڈے پر زور دئیے جانے کے ایک دن بعد عام آدمی پارٹی نے آج جاننا چاہا کہ کیا بی جے پی کی حکمرانی والی ریاستیں اب اپنے بجٹ کا زیادہ حصہ تعلیم، صحت اور روزگارپیدا کرنے پر خرچ کر یں گی ۔دہلی کے نائب وزیر اعلی اور سینئر آپ لیڈر منیش سسودیا نے وزیر اعظم سے کہا کہ وہ دہلی حکومت کی راہ میں رکاوٹ کھڑی کرنے سے گریز کریں۔مودی نے کل بی جے پی کے وزرائے اعلی کے اجلاس سے خطاب کرتے ہوئے کہا تھا کہ وہ اپنی ریاستوں کو اپنی حکومت کی اسکیموں کو لاگو کرنے کے معاملے میں ایک مثال طور پر پیش کریں۔بی جے پی نے غریبوں کی فلا ح و بہبودکا ایجنڈا طے کرنے کے لیے ایک کمیٹی بھی بنائی ہے۔اس کے ایک دن بعد سسودیا نے ٹوئٹر پراپنے اس ردعمل کا اظہا رکیا ہے ۔سسودیا نے کہاکہ مودی نے بھی مانا ہے کہ حکومت کا مطلب تعلیم، صحت اور روزگارکو یقینی بنانا ہے۔اگر پڑھائی لکھائی اور دوائی کوئی دوسری جملے بازی نہیں ہے ، تو کیا بی جے پی کی حکمرانی والی ریاستیں اب تعلیم اور صحت کو زیادہ سے زیادہ حصہ دے گی ۔آپ لیڈر نے ٹوئٹر پرکئے اپنے سلسلہ وار ٹوئٹ کے ذریعہ سوال کیاکہ کیا بی جے پی حکمرانی والی ریاستوں میں بھی محلہ کلینک اور پولی کلنک کھلیں گے ؟ کیا لوگوں کو مفت علاج کی سہولت مہیاکرائی جائے گی ؟ میں امید کرتا ہوں کہ وزیر اعظم دارالحکومت میں تعلیم، صحت اور روزگار سے جڑے مسائل پر رکاوٹ کھڑی نہیں کریں گے۔سسودیا نے یہ بھی سوال کیا کہ کیا بی جے پی کی حکمرانی والی ریاستوں میں سرکاری اسکولوں کو پرائیوٹ اسکولوں سے بہتر بنایا جائے گا؟انہوں نے پوچھاکہ کیا وہاں نجی اسکولوں پر لگام لگایا جائے گا ۔