مغربی بنگال:کانگریس ،ترنمول کانگریس کے ساتھ اتحادکرے،کانگریسی ایم پی ابوہاشم خان چودھری نے لوک سبھاالیکشن میں الائنس پرزوردیا
کولکاتہ:10/نومبر(ایس او نیوز/آئی این ایس انڈیا)لوک سبھاانتخابات سے قبل مغربی بنگال کانگریس کے لیڈروں میں ترنمول کانگریس یا بایاں محاذکے ساتھ اتحاد کرنے کاایشوگرم ہوتا جارہا ہے۔بنگال کانگریس کے لیڈران کھلے عام اپنے من پسند سیاسی جماعتوں کے ساتھ اتحاد کی وکالت کررہے ہیں۔جنوبی مالدہ سے ممبرپارلیمنٹ ابو ہاشم خان چودھری نے کہاہے کہ بی جے پی کو روکنے کے لیے ترنمول کانگریس سے اتحاد ناگزیر ہیں۔ابو ہاشم خان چودھری نے کہاہے کہ 2016کے اسمبلی انتخابات اور پنچایت انتخابات میں سی پی ایم کے ساتھ اتحاد کرچکے ہیں اس کا کوئی فائدہ نہیں ہواہے۔مگرلوک سبھا انتخابات میں ہمیں کوئی خطرہ مول لینے کی ضرورت نہیں ہے اور کانگریس کے مقامی لیڈران بھی ترنمول کانگریس کے ساتھ اتحاد کرنا چاہتے ہیں۔اس سے قبل شمال مالدہ سے ممبرپارلیمنٹ اور ابو ہاشم خان چودھری کی بھانجی موسم بے نظیر نے بھی ترنمول کانگریس کے ساتھ اتحاد کی پرزور وکالت کی تھی۔اس سے قبل کل ہی مغربی بنگال کانگریس صدر سومن مترا نے لوک سبھا انتخابات کے سوال پرکہاتھاکہ یہ فیصلہ پارٹی قیادت کرے گی تاہم پارٹی کے آئیڈیو لوجی اور پارٹی کے اتحاد کی قیمت پر کسی بھی سیاسی جماعت سے اتحاد نہیں کرے گی۔کانگریسی لیڈروں کے ذریعہ ترنمو ل کانگریس کے ساتھ اتحاد کی وکالت کیے جانے پر تنقید کرتے ہوئے بی جے پی لیڈر اور سابق بنگلہ اداکارہ لاکٹ چٹرجی نے کہا کہ کانگریس زمینی پکڑ کھوچکی ہے اس لیے اس کو سہارے کی ضرورت ہے۔