الہ آباد،29؍اپریل(ایس او نیوز؍آئی این ایس انڈیا)الہ آبادیونیورسٹی کیمپس میں لاگودفعہ144کی خلاف ورزی کرنے اوریونیورسٹی میں چل رہی ایک میٹنگ میں رکاوٹ پیداکرنے کے الزام میں چار اسٹوڈنٹ لیڈروں کی گرفتاری کے بعد مشتعل طلبا نے یونیورسٹی کیمپس میں کل توڑپھوڑکی۔پولیس نے نیم فوجی دستوں کی مدد سے حالات پر قابو پا لیا ہے۔ضلع کے سینئر پولیس سپرنٹنڈنٹ شلبھ ماتھر کے مطابق، الہ آباد یونیورسٹی طلبا یونین کے عہدیداروں کی قیادت میں کل دوپہر اسٹوڈنٹ لیڈروں کا ایک گروپ یونیورسٹی گیسٹ ہاؤس کے قریب جمع ہوگیا۔اس گیسٹ ہاؤس میں ایک میٹنگ چل رہی تھی۔اسٹوڈنٹ رہنماؤں نے یونیورسٹی میں مبینہ مالی بدعنوانی کے خلاف کارروائی کا مطالبہ کرتے ہوئے نعرے بازی کی۔ماتھر نے کہا کہ الہ آباد ہائی کورٹ کے حکم پر غیر قانونی طور پر رہ رہے طلبہ سے ہاسٹل خالی کرانے کی مہم کے چلتے احاطے میں پھیلی بدامنی کو دیکھتے ہوئے کچھ دنوں قبل یہاں دفعہ 144نافذ کی گئی تھی۔انہوں نے بتایاکہ اطلاع ملی تھی کہ بغیر اجازت بڑی تعداد میں طلبہ گیسٹ ہاؤس کے باہر جمع ہوئے ہیں۔اس پرپولیس پارٹی جائے وقوع پرپہونچی۔زیادہ تر مظاہرین بھاگ گئے، لیکن ان میں سے چار کو گرفتار کر لیا گیا۔ماتھرنے کہاکہ طالب علم اس گرفتاری پر بپھر گئے اور ان میں سے کچھ پرتشدد ہو گئے اور پولیس اہلکاروں پر پتھراؤ کیا اور پاس کھڑے گاڑیوں کے شیشے توڑ دیے۔انہوں نے ایک ہاسٹل کے پاس کھڑی بس میں آگ بھی لگا دی۔