باغپت ،23؍نومبر (ایس او نیوز؍آئی این ایس انڈیا) اُترپردیش    میں لاء اینڈآرڈر کی صورتحال کس قدربدحال ہےاور دن بدن اقلیتوں کے متعلق کس قدرنفرت کاماحول پیدا کیا جارہا ہے اس کااندازہ اس بات  سے لگایاجاسکتاہے کہ ریاست کے مختلف شہروں اور قصبوں میں اقلیتوں پر حملے مسلسل جاری ہیں اور نت نئے بہانے تراش کر مسلم شہریوں کو ہراساں کیا جارہا ہے۔ تازہ واردات  اتر پردیش کے باغپت ضلع میں چلتی ٹرین میں پیش آئی، جہاں 6سے 7غنڈوں نے مبینہ طور پر پر تین مسلم ٹیچروں کی بری طرح پیٹائی کی،  پھر   تینوں اساتذہ کو چلتی ٹرین سے باہر پھینک دیا۔

چلتی ہوئی ٹرین سے نیچے پھینکے جانے کے بعد تینوں ٹیچر شدید طور پر زخمی ہو گئے۔جس کی وجہ سے انہیں اسپتال میں داخل کرایا گیا ہے۔مسلم ٹیچروں کے مطابق جب وہ ٹرین سے واپس لوٹ رہے تھے، تبھی کچھ غنڈوں نے ان سے پوچھا کہ تم لوگوں نے سر پر رومال کیوں باندھ  رکھا ہے اور اسی رومال باندھنے کے نام پر اُن کی پیٹائی شروع کرکے ٹرین کے باہر پھینک دیا۔ ذرائع کے مطابق پولیس نے نامعلوم افراد کے خلاف مقدمہ درج کرتے ہوئے تحقیقات شروع کر دی ہے اور ملزمان کی تلاش میں جٹ گئی ہے۔

یاد رہے کہ اس سے قبل اُترپردیش کے گاؤں کھداولی کے رہنے والے  16سالہ  جنید کا  کچھ لوگوں نے چاقو مار کر قتل کر دیا تھا۔اس واقعہ میں جنید کے دو بھائی بھی شدید زخمی ہو گئے تھے۔اس معاملے میں پولیس پانچ ملزمان کو پہلے ہی گرفتار کر چکی ہے مگر اہم  سرغنہ کا پتہ لگانے میں پولس ابھی تک ناکام ہے۔