اب ریلوے ٹکٹ کی بکنگ کیلئے نیٹ ورک رکاوٹ نہیں بنے گا
جگدل پور: 22/مارچ(ایس اونیوز/آئی این ایس انڈیا )ریلوے اسٹیشن پرریزرویشن ٹکٹ لینے والوں کو اب بی ایس این ایل نیٹ ورک ٹھپ ہونے سے بھی کوئی پریشانی نہیں ہو رہی ہے۔کانکیر اور بھان پور ی کے نزدیک او ایف سی کٹ جانے سے دن بھر انٹرنیٹ اور موبائل فون سمیت دیگر خدمات ٹھپ ہو گئی تھیں۔اس کے باوجود ریلوے اسٹیشن میں ریلوے کا اپنا نیٹ ورک برابر کام کرتا رہا اور لوگوں کو باقاعدہ ریزرویشن ٹکٹ بھی ملتے رہے۔ماضی میں بی ایس این ایل کے براڈبینڈ کے سہارے ریزرویشن کا کام چلتا تھا،آئے دن کیبل کٹنے یا دیگر رکاوٹوں کی وجہ سے نیٹ ورک ٹھپ ہو جانے سے نہ تو ٹکٹ کی بکنگ ہو پاتی تھیں اور نہ ہی ٹکٹ کینسل کرانے کا کوئی انتظام ہی ہو پاتا تھا۔اس صورت حال میں کئی بار مسافروں کو کافی نقصان اٹھانا پڑتا تھا، اس مسئلہ سے نجات حاصل کرنے کے لیے ریلوے نے اپنی نیٹ ورک سروس کی توسیع کیا اور جگدل پور سے دنتے واڑہ تک کے تمام اسٹیشنوں کو ریل ٹیل نیٹ ورک سے جوڑ دیاگیا ہے، حالانکہ جگدل پور اسٹیشن پر بی ایس این ایل اور ریل ٹیل دونوں کنکشن دستیاب ہیں،جس سے کسی ایک کے فیل ہونے پر بھی یہاں آسانی سے کام چلتا رہتا ہے۔حال ہی میں یہاں ریلوے سہولیات میں توسیع کرتے ہوئے اپریل میں وشاکھا پٹنم اور جگدل پور کے درمیان نائٹ ایکسپریس کا آغاز کیا جا رہا ہے، اس کے ساتھ ہی یہاں وائی فائی سروس کا آغاز بھی کیا جا رہا ہے، اس کے لیے روٹر اور وائرنگ کا کام تقریبا مکمل کر لیا گیا ہے۔یہ سہولت بی ایس این ایل سے ہٹ کر ریلوے کے اپنے نیٹ ورک ریل ٹیل پر ہی کام کرے گی۔اس کے تحت ریلوے اسٹیشن کے احاطے میں مفت میں وائی فائی سہولت دستیاب ہوگی، حالانکہ مفت وائی فائی سروس شروع کرنے کی باقاعدہ تاریخ اب تک طے نہیں کی جا سکی ہے۔ریلوے کا یہ اپنا نیٹ ورک ہے، اس کے ذریعے ریلوے لائن کے کنارے سے ہو کر او ایف سی لائن بچھائی گئی ہے۔ریلوے کے تمام مواصلاتی نظام اس پر کام کرتے ہیں، ریل ٹیل کے نام سے یہ نیٹ ورک پورے ملک میں،جہاں جہاں ریلوے لائن پہنچتی ہے، وہاں دستیاب ہے۔چند سال پہلے اس کے کمرشیل استعمال کی بھی تجویز دی گئی تھی، لیکن بعد میں یہ ٹال دی گئی۔جس کے بعد اس علاقے میں نجی کاروباری آ گئے۔اسی نیٹ ورک کے سہارے ملک بھر کے بڑے ریلوے اسٹیشنوں میں وائی فائی سروس فراہم کی جا رہی ہے۔