نئی دہلی،26/اپریل (ایس او نیوز/آئی این ایس انڈیا)عام آدمی پارٹی کی رکن اسمبلی الکا لامبا نے اپنے علاقے میں آپ امیدواروں کی شکست کی ذمہ داری لیتے ہوئے ممبر اسمبلی اور پارٹی کے تمام عہدوں سے استعفی دینے کی پیشکش کی ہے۔چاندنی چوک اسمبلی حلقہ کی نمائندگی کرنے والی الکا نے ٹوئٹ کیا،میں نے اپنے حلقہ کے سبھی تین وارڈوں میں پارٹی امیدواروں کی شکست کی ذاتی ذمہ داری لیتی ہوں اور پارٹی کے تمام عہدوں اور ممبر اسمبلی کے طور پر بھی استعفی کی پیشکش کرتی ہوں۔بہر حال، الکا نے کہا کہ وہ کیجریوال کی حمایت کرنا اور انہیں مضبوطی فراہم کرنا جاری رکھیں گی۔انہوں نے کہا، میں ذاتی طورپرتینوں وارڈوں میں ہوئی شکست کی ذمہ داری لیتے ہوئے پارٹی کو اپنے تمام عہدوں اور ممبر اسمبلی کے عہدے سے استعفیٰ کی پیشکش کرتی ہوں۔حالانکہ الکا کے پاس پارٹی میں کوئی بھی اہم عہدہ نہیں ہے، انہیں گزشتہ سال پارٹی کے سرکاری ترجمان کے پینل سے بھی ہٹا دیا گیا تھا، حالانکہ اس کے برعکس عام آدمی پارٹی کی کراری شکست کے بعد ریاست کے نائب وزیر اعلی منیش سسودیا نے اس کا ٹھیکرا ای وی ایم پرپھوڑا ہے۔منیش سسودیا نے ٹوئٹر پر کئے ٹوئٹ میں الزام لگاتے ہوئے کہا کہ بی جے پی نے 2009کا الیکشن ہارنے کے بعد پانچ سال تک ای وی ایم پر ریسرچ کرکے مہارت حاصل کی تھی اور آج اسی ریسرچ اور مہارت کے دم پر الیکشن جیت رہی ہے۔