ریاستوں کے نتائج سے لوک سبھا انتخابات پر کوئی اثر نہیں پڑے گا: پاسوان
نئی دہلی،13؍ دسمبر (ایس او نیوز؍آئی این ایس انڈیا) بی جے پی کے اتحادی پارٹی ایل جے پی کے سربراہ اور مرکزی وزیر رام ولاس پاسوان نے جمعرات کو زور دیا کہ کچھ ریاستوں میں حال ہی میں ہوئے اسمبلی انتخابات میں بی جے پی کی شکست کا آئندہ لوک سبھا انتخابات پر کوئی اثر نہیں پڑے گا اور وزیر اعظم نریندر مودی 2019 میں فتح کے لئے حکمراں این ڈی اے کی قیادت کریں گے۔لوک جن شکتی پارٹی (ایل جے پی) کے صدر پاسوان نے تین ریاستوں میں بی جے پی کی شکست کے لئے ’ اقتدار مخالف لہر‘کو ذمہ دار مانا ہے۔ انہوں نے کہا کہ اقتدار مخالف لہر کے باوجود مدھیہ پردیش اور راجستھان میں بی جے پی کا ووٹ شیئر تقریبا کانگریس کے برابر ہی رہا۔ان دونوں ریاستوں میں کانگریس کو جیت حاصل ہوئی۔منگل کو انتخابی نتائج کے اعلان کے بعد پہلی رد عمل ظاہر کرتے ہوئے دلت لیڈر پاسوان نے کہاکہ ان نتائج کا لوک سبھا انتخابات پر کوئی اثر نہیں پڑے گا۔قومی جمہوری اتحاد (این ڈی اے) برقرار اور مودی کی قیادت میں یہ 2019 میں کامیابی حاصل کر مرکز میں اپنی حکومت برقرار رکھے گا۔پاسوان نے کہا کہ جمہوریت میں عوام کے مینڈیٹ کا ہمیشہ احترام کیا جاتا ہے۔انہوں نے کہا کہ اب ان تینوں ریاستوں میں کانگریس اقتدار میں آئی ہے اور اسے وہاں کام کرنا چاہئے۔غور طلب ہے کہ اگلے سال ہونے والے عام انتخابات سے پہلے بی جے پی کو راجستھان، مدھیہ پردیش اور چھتیس گڑھ میں بڑا جھٹکا لگا ہے۔تینوں ریاستوں میں اس اسمبلی انتخابات میں شکست ملی اور یہ ریاست اس کے ہاتھ سے نکل گئے۔چھتیس گڑھ میں کانگریس نے یکطرفہ کامیابی حاصل کی، تو وہیں راجستھان اور مدھیہ پردیش میں اس کے اور بی جے پی کے درمیان کانٹے کی ٹکر رہی تلنگانہ اور میزورم میں بھی بی جے پی کی کارکردگی بہتر نہیں رہی۔