شیوسینا نے لوک سبھا میں اٹھایا رام مندر کا مسئلہ، آرڈیننس کا مطالبہ
نئی دہلی،13؍ دسمبر (ایس او نیوز؍آئی این ایس انڈیا) لوک سبھا میں جمعرات کو شیوسینا نے ایودھیا میں رام مندر کا مسئلہ اٹھایا اور کہا کہ مندر کی راہ ہموار کرنے کے لئے حکومت آرڈیننس لائے۔بی جے پی کی اتحادی پارٹی کے رکن آنندراؤ اڈسل نے وقفہ صفر کے دوران ایوان میں رام مندر کا مسئلہ اٹھاتے ہوئے کہا کہ موجودہ حکومت کو ساڑھے چار سال گزر گئے اور اب تک مندر کو لے کر کوئی پہل نہیں کی گئی۔انہوں نے کہا کہ پہلے کی بی جے پی حکومتیں بہت اتحادیوں پر انحصار تھیں لیکن اس حکومت کے پاس مکمل اکثریت ہے اور اسے رام مندر پر تاخیر نہیں کرنا چاہئے۔ شیوسینا رکن نے کہا کہ بی جے پی نے اپنے منشور میں رام مندر کی تعمیر کی بات کی ہے۔اس حکومت کو ساڑھے چار سال ہو گئے ہیں اور پانچ ریاستوں کے اسمبلی انتخابات کے نتائج بھی سامنے ہیں۔ایسے میں حکومت کو آرڈیننس لانا چاہئے۔شیوسینا کے ارکان نے ایودھیا میں رام مندر کی تعمیر کا مطالبہ کرتے ہوئے بدھ اور جمعرات کو بھی لوک سبھا میں نعرے بازی کی۔پارٹی ارکان نے ہاتھوں میں تختیاں لے رکھی تھیں جن پر ’ہر ہندو کی یہی پکار، پہلے مندر پھر سرکار‘نعرہ لکھا ہوا تھا۔پارٹی ارکان نے بدھ کو پارلیمنٹ ہاؤس کے احاطے میں اسی مسئلے پر دھرنا دیا تھا۔