نئی دہلی،18؍اپریل(ایس او نیوز؍آئی این ایس انڈیا) صحافی روہنی سنگھ بمقابلہ جے شاہ کیس میں سپریم کورٹ نے معاملے میں عدالت سے باہر سمجھوتہ کرنے کا مشورہ دیا ہے؛ لیکن دی وائر کی طرف سے تجویز ماننے سے انکار کیا گیا ہے اور کہا کہ یہ اسٹوری عوامی مفاد میں کی گئی ہے ۔

واضح ہو کہ اس معاملہ کے تحت سپریم کورٹ اب جولائی میں سماعت کرے گا۔ سپریم کورٹ وائر کی صحافی روہنی سنگھ کی عرضی پر سماعت کر رہا تھا ۔ روہنی نے گجرات ہائی کورٹ کے فیصلے کو چیلنج کیا ہے جس میں بی جے پی صدر امت شاہ کے بیٹے جے شاہ کی طرف سے داخل مجرمانہ ہتک عزت کیس کو منسوخ کرنے کا مطالبہ مسترد کر دیا تھا ۔ گزشتہ سماعت میں سپریم کورٹ نے 12 اپریل تک ٹرائل پر روک لگا دی تھی۔ گجرات ہائی کورٹ نے ویب پورٹل دی وائر کی صحافی روہنی سنگھ کی درخواست کو مسترد کر دیا تھا، جس میں انہوں نے جے شاہ کی طرف سے داخل مجرمانہ ہتک عزت کیس کو منسوخ کرنے کی مانگ کی تھی۔

ویب سائٹ نے دعویٰ کیا تھا کہ این ڈی اے کے اقتدار میں آنے کے ایک سال بعد ان کی کمپنی کا کاروبارسولہ ہزار گنا بڑھ گیا تھا۔ 2014 میں نریندر مودی کے وزیر اعظم بننے کے بعد کمپنی نے اپنے کاروبار میں بھاری اضافہ کیا جس کو ٹرن اوور کہاجاتا ہے ۔ ایک سال میں اس کی آمدنی پچاس ہزار روپے سے بڑھ کر 80 کروڑ روپے ہو گئی۔ جے شاہ نے مضمون کی مصنفہ روہنی سنگھ کے خلاف ایک مجرمانہ ہتک عزت مقدمہ دائر کیا ہے۔ مجرمانہ ہتک عزت کے معاملے میں میٹروپولیٹن مجسٹریٹ نے 13 نومبر کو تمام مدعا علیہان کو بلایا تھا۔ بھارتیہ جنتا پارٹی صدر امت شاہ کے بیٹے جے شاہ گیگ حکم کی وجہ سے محفوظ تھے۔ احمد آباد کورٹ نے ویب سائٹ کے خلاف حکم دیا تھا کہ وہ بالواسطہ یا بلاواسطہ امت شاہ کے خلاف کسی خاص طور پر رپورٹ شائع نہیں کر سکتے جس کے بعد دی وائر نے ہائی کورٹ کے طرف رخ کیا تھا، لیکن ہائی کورٹ نے عرضی خارج کر دی۔