منی لانڈرنگ معاملے میں صحافی اپیندر رائے کی ضمانت کی درخواست مسترد
نئی دہلی:13/نومبر(ایس او نیوز/آئی این ایس انڈیا)دہلی کی ایک عدالت نے مبینہ طور پر زبردستی وصولی اور مشکوک مالیاتی لین دین سے متعلق منی لانڈرنگ کے ایک معاملے میں گرفتار صحافی اپیندر رائے کی ضمانت کی درخواست منگل کو مسترد کر دی۔ایڈیشنل سیشن جج راکیش سیال نے رائے کو یہ کہہ کر راحت دینے سے انکار کر دیا کہ ان کے خلاف لگے الزامات سنگین ہیں۔عدالت نے ای ڈی کے خصوصی سرکاری وکلاء این کے مٹا اور نتیش رانا کی ان دلیلوں پر غور کیا کہ ملزم کو اگر ضمانت پر رہا کیا گیا تو وہ گواہوں اور تفتیش کو متاثر کر سکتے ہیں۔ مشتبہ مالیاتی لینے دین سے متعلق مرکزی تفتیشی بیورو (سی بی آئی) کے ایک معاملے میں تہاڑ جیل میں بند رائے کو ضمانت ملنے کے کچھ ہی وقت بعد ای ڈی نے آٹھ جون کو انہیں منی لانڈرنگ کی روک تھام قانون (پی ایم ایل اے) کے تحت جیل سے ہی گرفتار کر لیا تھا۔