ماسکو،19اپریل(ایس او نیوز/آئی این ایس انڈیا)روسی صدر ولادی میر پوتن نے اپنے ترک ہم منصب رجب طیب ایردوآن کو دستور میں ترامیم کے لیے کرائے گئے ریفرنڈم میں کامیابی پر مبارک باد پیش کی ہے۔ترک خبر رساں ادارے ”اناطولیہ“ نے ایوان صدر کے ذرائع کے حوالے سے بتایا ہے کہ روسی صدر ولادی میر پوتن نے صدر ایردوآن کو ٹیلیفون کرکے انہیں ریفرنڈم میں کامیابی پرمبارک باد پیش کی۔ذرائع کے مطابق دونوں رہ نماؤں نے دو طرفہ تعلقات کو مزید مستحکم کرنے اور سنہ 2015ء میں ترک فوج کے ہاتھوں روسی طیارہ مار گرائے جانے کے بعد پیدا ہونے والی کشیدگی دور کرنے سے اتفاق کیا ہے۔ٹیلیفون پربات چیت کرتے ہوئے ترک صدر رجب طیب ایردوآن اور ان کے روسی ہم منصب نے شام میں انقرہ اور ماسکو کے تعاون سے جنگ بندی کو مزید موثر بنانے کی ضرورت سے بھی اتفاق کیا۔امریکا کے صدر ڈونلڈ ٹرمپ نے بھی ایردوآن کو ریفرنڈم میں کامیابی پر مبارک باد پیش کی ہے تاہم ترک اپوزیشن نے اس پر اعتراض کیا ہے جب کہ یورپی یونین کی طرف سے بھی ترکی میں صدارتی نظام کے حق میں کرائے گئے ریفرنڈم پر محتاط رد عمل ظاہر کیا ہے۔