بی جے پی کو پھر طلاق ثلاثہ کی یاد آہی گئی : مودی نے تین طلاق کو ملک بدر کرنے کا کام کیا ہے:امیت شاہ
ستنا /مدھیہ پردیش ،15؍ اکتوبر (ایس او نیوز؍آئی این ایس انڈیا ) بی جے پی صدر امت شاہ نے پیر کو کہا کہ وزیر اعظم نریندر مودی نے کانگریس کی شدید مخالفت کے باوجود طلاق ثلاثہ کو ملک سے نکالنے کا کام کرمبینہ طور پر مسلم سماج کی خواتین کے اعزاز کا مبینہ’ دفاع’ کیا ہے۔
امت شاہ نے یہاں کانفرنس سے خطاب کرتے ہوئے کہا کہ کانگریس نے مسلم سماج کی ماؤں بہنوں کے اعزاز کی فکر نہیں کی۔ کانگریس طلاق ثلاثہ پر ہمت نہیں دکھا پائی۔ امیت شاہ نے کہا کہ مودی نے کانگریس کی مخالفت کے باوجود تین طلاق کو ملک سے نکالنے کا کام کیا ہے۔ پروگرام میں دائیں جانب بڑی تعداد میں مسلم خواتین بھی موجود تھیں ، جسے کے تحت پورے پنڈال میں چہ می گوئیاں بھی ہوتی رہیں۔ ستنا ضلع کے کئی علاقوں سے خواتین کو ’خصوصی ‘طور پر بلایا گیا تھا۔ شاہ نے کہا کہ مودی نے صرف الفاظ سے نہیں بلکہ مرکزی کابینہ میں مقام دے کر خواتین کے اعزاز کا احترام کیا ہے۔
واضح ہو کہ ان کی کابینہ میں 9 خواتین وزیر ہیں، جن میں نرملا سیتارمن وزیر دفاع اور سشما سوراج وزیر خارجہ شامل ہیں۔انہوں نے کہا کہ دنیا کے تمام ممالک سے تعلقات قائم کرنے اور تجارت کے فروغ کے لیے سشماسوراج کی ذمہ داری ہے۔امیت شاہ نے کہا کہ آج بی جے پی کی حکومت میں چھ خواتین گورنر مقرر کی گئی ہیں۔ یہاں تک کہ مدھیہ پردیش کی گورنر بھی گجرات کی پہلی وزیر اعلی رہیں آنندی بین پٹیل ہیں۔ انہوں نے کہا کہ مدھیہ پردیش میں پولنگ ہونے والے ہیں اور بی جے پی ایک بار پھر ’’وکاس ‘‘ کی راہ پر چلنے کے لئے ’’ناری شکتی ‘‘کا ساتھ چاہتی ہے۔