تری پورہ میں بی جے پی کو بڑا جھٹکا؛ ایک ہزار سے زائد کارکنان کانگریس میں شامل
اگر تلہ، 10؍دسمبر (ایس او نیوز؍ آئی این ایس انڈیا) تری پورہ میں کانگریس کو آج اس وقت بڑی کامیابی ملی جب بھارتیہ جنتا پارٹی (بی جے پی) کے ایک ہزار کارکنوں نے کانگریس میں شمولیت اختیار کر لی۔ پارٹی تبدیلی کا ایک دلچسپ پہلویہ بھی ہے کہ یہ بی جے پی کارکنان پہلے کانگریس میں ہی تھے اور ایک سال پہلے انڈین نیشنل اسٹوڈنٹس یونین کے سابق ریاستی صدر مجیب الاسلام مجمدار کی قیادت میں بی جے پی میں شامل ہوئے تھے، لیکن اب انہوں نے یہ کہتے ہوئے پھر کانگریس کا دامن تھام لیاکہ بی جے پی آئینی معیار پر عمل نہیں کر رہی اور فرقہ وارانہ سیاست کو فروغ دے رہی ہے۔یہاں کانگریس بھون میں منعقد ایک سادہ پروگرام میں ہزاروں کی تعدادمیں بی جے پی چھوڑ کر آئے کارکنوں نے کانگریس کی رکنیت حاصل کی۔ اس موقع پر آل انڈیاکانگریس کمیٹی کے ریاستی انچارج بھوپین وورا بھی موجودتھے۔ ریاستی کانگریس صدر وکرجیت سنہانے کارکنوں کا خیر مقدم کیا اور کہا کہ ریاست میں بی جے پی کی خراب کارکردگی کو دیکھتے ہوئے کانگریس میں آنے کے لیے اوربہت سے کارکن انتظار میں ہیں۔ ان میں ترنمول کانگریس کے بھی کارکن شامل ہیں۔دوسری طرف صوبائی بی جے پی صدر وپلو کمار دیو نے رد عمل کا اظہار کرتے ہوئے کہا کہ کانگریس میں واپس گئے لوگ اس امید کے ساتھ بی جے پی میں آئے تھے کہ وہ اپنے ذاتی مفاد کے لئے پارٹی کا استعمال کر سکتے ہیں اور کچھ تو الیکشن لڑنے کا خواب لے کرآئے تھے، لیکن وہ اپنامقصدپورا نہیں کر پائے۔ انہوں نے زور دیتے ہوئے کہا کہ ان کے جانے سے بی جے پی پر کوئی اثر نہیں پڑے گا۔