نئی دہلی،06؍ فروری(ایس او نیوز؍آئی این ایس انڈیا)مغربی افریقہ کے سمندر میں لاپتہ تیل کے ٹینکر کا پتہ چل گیا ہے۔وزیر خارجہ سشما سوراج نے بتایا کہ افریقہ کے بینن سمندر سے دور ہفتہ کو لاپتہ ہوئے آئل ٹینکر جہاز کو چھڑا لیا گیا ہے۔ایسی خبریں آئی تھیں کہ اسے ڈاکوؤں نے اغوا کر لیا تھا۔اس تیل ٹینکر کے عملے کے تمام 22 رکن ہندوستانی ہیں۔وزیر خارجہ نے ٹویٹ کرکے اس بات کی جانکاری دی اور لکھاکہ مجھے یہ بتاتے ہوئے خوشی ہو رہی ہے کہ 22 ہندوستانیوں سمیت مرچنٹ شپ میرین ایکسپریس کو چھڑا لیا گیا ہے۔ہم نائیجیریا اور بینن کی حکومتوں کو ان کی مدد اور حمایت کے لئے شکریہ اداکرتے ہیں۔حکام نے بتایا کہ ڈاکوؤں نے چار دن بعدجہاز کے عملہ کے تمام اراکین کو چھوڑ دیا ہے۔وہ محفوظ ہیں اور جہاز نے آگے کا اپنا سفر شروع کر دیا ہے۔سشما سوراج نے لاپتہ آئل ٹینکر کا پتہ لگانے میں مدد مانگنے کے لئے کل نائیجیریا کے اپنے ہم منصب سے بات کی تھی۔ابوجا میں ہندوستانی مشن جہاز کا پتہ لگانے کے لئے نائیجیریا اور بینن کے رابطہ میں تھا۔ممبئی میں شپنگ کی ڈائریکٹر جنرل مالنی شنکر نے بتایاکہ میرین ایکسپریس نام کے جہاز کو چھوڑ دیا گیا ہے اور اب یہ کپتان کی کمان میں ہے یہ ابھی واضح نہیں ہو سکا ہے کہ جہاز اور لوازمات کو چھڑانے کے لیے تاوان دیاگیا ہے یا نہیں۔میرین ایکسپریس کو بینن میں گنی کی خلیج میں ایک فروری کو ڈاکوؤں نے اغوا کر لیا تھا۔پوسٹ میں بتایا گیا ہے کہ جہاز میں 13,500 ٹن گیسولن اب بھی ہے۔نوہون ڈائریکٹوریٹ جنرل(ڈی جی ایل)کے ایک افسرنے پہلے بتایا تھاکہ سمندر کے جس حصے سے اغوا کیا گیا ہے وہ غیر محفوظ ہے کیونکہ علاقہ ڈاکوؤں سے بھراہواہے۔