پٹنہ:17/نومبر(ایس او نیوز/آئی این ایس انڈیا)رالوسپاسربراہ اور مرکزی وزیر اوپندر کشواہا نے بہار میں سیٹوں پربات بنتی نہ دیکھ مورچہ کھول دیاہے۔انہوں نے واضح طور پر کہا ہے کہ اب وہ اس معاملے پر بی جے پی کے صدر امت شاہ سے ملاقات کے بجائے وزیر اعظم نریندر مودی سے ملیں گے۔کشواہا نے خبردار کیا کہ اگر نشست تقسیم کے فارمولہ پراتفاق نہیں ہواتو 2019لوک سبھا انتخابات میں بی جے پی کی قیادت والی این ڈی اے کو بھاری قیمت ادا کرنی پڑے گی۔پریس کانفرنس میں نتیش کمار کے مبینہ نیچ والے بیان کو نشانہ بناتے ہوئے کہا کہ اب پارٹی اونچ نیچ مخالف دن بھی منائے گی۔انہوں نے کہا کہ نتیش حکومت میں قانون نظام کی صورتحال خراب ہو رہی ہے لیکن حکومت ہاتھ پر ہاتھ رکھے ہوئے ہے۔انہوں نے نتیش کمار حکومت سے مطالبہ کیا کہ وہ جرم کے واقعات کو روکنے کے لئے ابتدائی طور پرسخت اقدامات کریں۔
کشواہا نے الزام لگایاکہ ان کی پارٹی کوتوڑنے کی کوشش ہورہی ہے ۔اس کاٹھیکرانہوں نے نتیش کمارپھوڑتے ہوئے کہاکہ اس کیلئے براہ راست نتیش کمار ذمہ دار ہیں اور خود وزیر اعلی لیڈران کوفائدہ دکھارہے ہیں،یہ ایک نفرت انگیز چیز ہے۔نتیش کمار کو ایسی کوششوں سے بازآنا چاہئے،سیٹ تقسیم پرکشواہا نے کہا کہ انہوں نے مسلسل کوشش کی ہے،ہماری بات بھوپندر یادو سے ہوئی ، ان کی طرف سے جوپیشکش ہوئی،اسے پارٹی کی میٹنگ میں ٹھکرادیاگیا۔کشواہا نے کہا کہ اس مہینے کے اختتام تک وہ سیٹ تقسیم پر بات چیت کرتے ہوئے معاملہ کو حل کرنے کی کوشش کریں گے۔انہوں نے دعوی کیا کہ وہ امت شاہ سے بات نہیں کریں گے۔وزیر اعظم کے ساتھ بات کرکے اس کاحل نکالاجائے گا۔آپ کو بتادیں کہ اس سے پہلے جہاں رالوسپا کی میٹنگ میں دونوں ایم ایل اے نداردرہے،وہیں موجود ایک ایم پی نے این ڈی اے کے ساتھ رہنے پر زوردیا۔