بھروچ3دسمبر (ایس او نیوز؍آئی این ایس انڈیا) بھروچ میں وزیراعظم مودی نے انتخابی ریلی میں عوام سے خطاب کرتے ہوئے کہا کہ 9 دسمبر کو آپ اپنی انگلی کی مدد سے گجرات کی قسمت چمکا سکتے ہیں ۔ انہوں نے کہا کہ گجرات کے جس مقام پر گیا ہوں ، ایسامحسوس ہوتا ہے کہ وہاں بی جے پی کی آندھی چل رہی ہے ۔ گویا مودی بی جے پی کے رقص شرر میں عوام کو جھونک ہی دینا چاہتے ہیں، انہوں نے کانگریس کو نشانہ بناتے ہوئے کہا کہ اتر پردیش کانگریس کے رہنما پانڈے نہرو سے سونیا اور راہول تک انتخابی مہم میں مصروف تھے؛ لیکن پھر بھی یوپی بلدیاتی انتخابات میں کانگریس کا سرے سے صفایا ہوگیا ، یہی حال گجرات میں بھی ہونے والا ہے ۔ مودی نے اقلیت پرستی کا شوشہ چھوڑتے ہوئے کہا کہ بھروچ اور کچھ میں مسلم آبادی کافی زیادہ ہے. اگر آپ بی جے پی کے دور اقتدار کے لحاظ سے دیکھیں گے تو یہی دو اضلاع ترقی میں آگے ہیں ۔ یہ پہلا ایساموقعہ ہے جب مودی نے اپنی ترقی ارو مبینہ ’ وکاس ‘ کے ذکر کے لیے مسلم آبادی کا ذکر کیا ہے ۔ علاوہ ازیں سریندر نگر کی ایک ریلی میں برجستہ کہا کہ125کروڑ بھارتی ان کے مخدوم ہیں میں ان کی خدمت کر رہا ہوں ۔ واضح ہوکہ گجرات میں ووٹنگ کا پہلا مرحلہ دسمبر کو منعقدہو گا۔اور اس کم و قت میں مودی 7سے زائد ریلیاں کریں گے ۔یہ توقع ظاہر کی جا رہی ہے کہ مودی کے براہ راست انتخابی مہم میں حصہ لینے کی وجہ سے گجرات انتخاب کی جنگ دلچسپ ہوگی نیز مودی کے لیے وقار کی بات بھی ہوگی، تاہم بی جے پی کو انتخاب میں ’ غیر مرئی قوتوں ‘ کے امداد کی صد فیصد توقع ہے ؛ لیکن ادھر راہل گاندھی اور کانگریس پارٹی بھی تازہ دم ہوکر انتخابی جنگ میں شرکت کر رہی ہے، مودی اور بی جے پی کے پاس’ گجرات ماڈل ‘ کا پھٹا ہوا ڈھول ہے تو کانگریس کے پاس نوٹ بندی اور جی ایس ٹی جیسے اہم تشنہ مسائل ہیں ۔