این آئی اے نے اڑی میں فوج کے ذریعہ گرفتار کئے گئے 2 افراد کو حراست میں لیا
سری نگر ؍نئی دہلی، 27؍ستمبر(ایس او نیوز ؍آئی این ایس انڈیا )قومی جانچ ایجنسی نے اڑی میں فوجی اڈے پر ہوئے حملے کی تحقیقات کے سلسلے میں ان دو افراد کو اپنی حراست میں لے لیا جنہیں فوج نے گرفتار کیا تھا۔ساتھ ہی ایجنسی نے ہلاک ہوئے چار حملہ آوروں میں سے ایک کی شناخت پاک مقبوضہ کشمیر سے تعلق رکھنے والے شخص کے طور پر کی ہے۔سرکاری ذرائع نے بتایا کہ این آئی اے نے دونوں افراد کو اپنی حراست میں لے لیا ہے جن کی شناخت کھیاں کلا ں رہائشی احسان خورشید عرف ڈی سی اور پوتھا جہانگیر رہائشی فیصل حسین اعوان کے طور پر کی گئی ہے۔یہ دونوں جگہیں پاک مقبوضہ کشمیر میں آتی ہیں۔ان دونوں کو بی ایس ایف اور فوج نے ایک مشترکہ مہم میں ہفتہ کو اڑی کے گوالاتا گاؤں کے قریب واقع انگور چوکی پر گرفتار کیا گیا تھا۔اس وقت وہ ہندوستان میں دراندازی کی کوشش کر رہے تھے۔دونوں کے پاک مقبوضہ کشمیر کے باشندے ہونے کی وجہ سے فوجی حکام نے ان سے اس بارے میں پوچھ گچھ کی کہ کیا انہیں اس حملے کی کوئی معلومات ہے ، جس میں چار دہشت گردوں نے اڑی کے فوجی ٹھکانے پر حملہ بول دیا تھا۔18؍ستمبر کوہوئے اس حملے میں 18فوجی شہید ہوئے تھے۔ذرائع نے کہا کہ دونوں نے شروع میں یہ دعوی کیا کہ وہ نادانستہ طور پر سرحد پار کر ہندوستان آ گیا تھا۔ان دونوں سے مسلسل پوچھ گچھ کے بعد انہوں نے سیکورٹی ایجنسیوں کو ان دو گائیڈوں کے بارے میں بتایا جنہوں نے دہشت گردوں کی دراندازی میں مدد کی تھی۔ان دونوں نے حملے میں ملوث ایک دہشت گرد کی بھی شناخت کروانے میں مدد کی۔مارے گئے ایک دہشت گرد کی شناخت این آئی اے نے پاکستانی مقبوضہ کشمیر کے مظفر آباد تحصیل میں دربانگ کے حافظ احمد کے طور پر کی ہے۔دونوں کو قومی دارالحکومت لایا جائے گا جہاں ان کے سائنسی ٹیسٹ کئے جائیں گے۔ساتھ ہی سیکورٹی ایجنسیوں کی مشترکہ ٹیم ان سے پوچھ گچھ کریں گی ۔ذرائع نے بتایا کہ دونوں کو شروع میں جیش محمد نے اپنے دہشت گردوں کو کنٹرول لائن سے دراندازی کرنے میں مدد کرنے کے لیے بھرتی کیا تھا۔بعد میں وہ دوسرے دہشت گرد گروپوں کی بھی اس کام میں مدد کرنے لگے۔