نیشنل ہیرالڈ کیس: سونیا، راہل اور آسکر کے انکم ٹیکس کے معاملے میں عبوری حکم میں توسیع
نئی دہلی:8/جنوری (ایس او نیوز/آئی این ایس انڈیا)کانگریس صدر راہل گاندھی، یو پی اے کی صدر سونیا گاندھی اور سینئر لیڈر آسکر فرنانڈیز کے انکم ٹیکس کا نئے سرے سے جانچ پڑتال کرنے کے معاملے میں سپریم کورٹ نے اپنے اس عبوری حکم کو بڑھا دیا جس میں کہا گیا ہے کہ محکمہ انکم ٹیکس تینوں کے خلاف حکم تو پاس کر سکتا ہے لیکن کیس کے تصفیے تک اسے لاگو نہیں کر سکتا۔ سپریم کورٹ 29 جنوری کو اس معاملے کی سماعت کرے گا۔سپریم کورٹ میں انکم ٹیکس محکمہ نے کہا کہ ان کے ٹیکس کا تعین دوبارہ کیا گیا ہے اور ان کے خلاف حکم جاری کیا گیا ہے؛ لیکن سپریم کورٹ کے حکم کے مطابق وہ حکم لاگو نہیں کیا گیا ہے۔گزشتہ سماعت میں سپریم کورٹ نے محکمہ انکم ٹیکس کو پارٹی صدر راہل گاندھی، یو پی اے کی صدر سونیا گاندھی اور سینئر لیڈر آسکر فرنانڈیز کے انکم ٹیکس کا نئے سرے سے جانچ پڑتال جاری رکھنے کا حکم دیا تھا۔ اگرچہ کورٹ نے کہا کہ اس تشخیص کو عدالت کے آخری حکم کے بعد ہی عمل میں لایا جا سکتا ہے۔ واضح ہو کہ یو پی اے کی صدر سونیا گاندھی، کانگریس صدر راہل گاندھی اور آسکر فرنانڈیز نے دہلی ہائی کورٹ کے اس حکم کو چیلنج کیا ہے جس میں اس نے نیشنل ہیرالڈ معاملے سے متعلق 2011۔12 کے ان کے انکم ٹیکس کی تشخیص دوبارہ کھولنے کی ہدایات دی گئی تھی۔گزشتہ سماعت کے دوران سپریم کورٹ نے راہل اور سونیا گاندھی کے نام جاری محکمہ انکم ٹیکس کے نوٹس پر روک لگانے سے انکار کر دیا تھا، لیکن ان کی درخواست کو سننے کی منظوری دی تھی۔