نئی دہلی،23؍اپریل (ایس او نیوز؍آئی این ایس انڈیا )اگلے ماہ مودی حکومت کے تین سال پورے ہونے اور آئندہ صدر اور نائب صدر کے عہدے کے انتخابات کے تناظر میں بی جے پی کی حکمرانی والی ریاستوں کے وزرائے اعلیٰ کااجلاس /23اپریل کو نئی دہلی میں ہونے جا رہا ہے، جسے وزیر اعظم نریندر مودی خطاب کریں گے ۔بی جے پی کے قومی جنرل سکریٹری بھوپندر یادو کی جانب سے جاری اعلامیہ میں کہا گیا ہے کہ یہ اجلاس شام 6بجے بی جے پی کے مرکزی دفتر میں منعقد ہو گا ، اجلاس میں بی جے پی صدر امت شاہ بھی لیڈروں سے بات چیت کریں گے۔ان کے علاوہ اس اجلاس میں مرکزی وزیر داخلہ راج ناتھ سنگھ، شہری ترقیات کے وزیر ایم وینکیا نائیڈو، وزیر خارجہ سشما سوراج، سڑک نقل وحمل ، ہائی وے اور شپنگ کے مرکزی وزیر نتن گڈکری، تنظیمی جنرل سکریٹری رام لال اور بی جے پی کی حکمرانی والی 13ریاستوں کے تمام وزرائے اعلی اور پانچ نائب وزیر اعلی موجود رہیں گے۔مرکز میں وزیر اعظم نریندر مودی کی قیادت میں بی جے پی کی حکومت بننے کے بعد بی جے پی کے حکمرانی والی ریاستوں کے وزرائے اعلی کا اجلاس اس سے پہلے 27؍اگست، 2016کو ہوا تھا، اس باریہ اجلاس ایسے وقت میں ہونے جا رہا ہے، جب 26؍مئی کو مودی حکومت تین سال کی مدت مکمل کرنے جا رہی ہے۔اس کے علاوہ بی جے پی کی حکمرانی والی ریاستوں کے وزیر اعلی اتوار کو پارٹی صدر امت شاہ سے ملاقات کریں گے، جہاں ان کی ریاستوں میں پارٹی کے اقتدار کے ایجنڈے کو نافذ کرنے پر بات چیت کرنے کا امکان ہے۔پارٹی ذرائع نے بتایا کہ نیتی آیوگ کی میٹنگ میں حصہ لینے کے لیے سبھی 13ریاستوں کے وزیر اعلی 23؍اپریل کو دہلی میں ہوں گے۔