حیدرآباد،23جنوری (ایس او نیوز؍ یواین آئی ) الکٹرانک ووٹنگ مشینوں (ای وی ایمس)کے استعمال پر تشویش کا اظہار کرتے ہوئے اے پی کے وزیراعلی و تلگودیشم پارٹی کے قومی صدر این چندرابابونائیڈو نے کہا کہ ان مشینوں میں الٹ پھیر کے کئی ثبوت پائے گئے ہیں اور تمام جماعتوں کو ان پر شبہات ہیں۔چندرابابو نے ریاستی دارالحکومت امراوتی میں منگل کو پارٹی کے لیڈروں کے ساتھ ٹیلی کانفرنس منعقد کی۔انہوں نے کہاکہ دنیا کے120ممالک کے منجملہ صرف20ممالک ہی اس ٹکنالوجی کا استعمال کر رہے ہیں۔انہوں نے کہا کہ تلگودیشم کی مساعی کے سبب ہی الیکشن کمیشن نے وی وی پیاٹس کو متعارف کیا تھا تاہم ملک کے تمام پولنگ بوتھس پر یہ وی وی پیاٹس نہیں لگائے گئے ۔انہوں نے کہاکہ الیکشن کمیشن وی وی پیاٹس سلپس دے رہا ہے ،بعض دفعات اس کی طباعت رائے دہندے کے لئے واضح نہیں ہورہی ہے ۔انہوں نے کہاکہ تمام22جماعتوں کے لیڈران جلد ہی الیکشن کمیشن سے ملاقات کرتے ہوئے رائے دہی کے طریقہ کار کو روایتی طریقہ میں بدلنے کے لئے نمائندگی کریں گے ۔