بھٹکل:15/ جنوری (ایس اؤنیوز) خانگی اسکولوں کی مقابلہ آرائی کے زمانےمیں بھی مرڈیشور کی سرکاری ماڈل ہائر پرائمری اسکول جس ترقی کی راہ پر گامزن ہے وہ قابل ستائش ہے۔اسکول میں سائنسی نمائش کا اہتمام، مختلف ثقافتی مقابلہ جات اور شاندار طریقے سے سالانہ جلسے کا انعقاد اسکول کے اساتذہ اور طلبا کی محنتوں کا نتیجہ ہے اور وہ تمام مبارکبادی کے مستحق ہیں۔ ان خیالات کا اظہار جماعت المسلمین مرڈیشور ک صدر محمد امین سیف اللہ نےکیا۔
وہ یہاں سنیچر 13جنوری کو سرکاری ماڈل اردو ہائر پرائمری بوائز اسکول کے سالانہ جلسہ میں صدارتی خطاب کررہے تھے۔ مہمانِ خصوصی کی حیثیت سے تشریف فرما انجمن پی یو کالج بھٹکل کے اردو لکچرر عبدالرؤوف سونور نے خطاب کرتے ہوئے کہاکہ مسلم ایجوکیشن سوسائٹی کے ذمہ داران اپنے مادر علمی کے متعلق جو لگاؤ اور فکر رکھتے ہیں اورجس طرح اسکول کی سہولیات کو بروقت فراہم کررہے ہیں وہ اپنے آپ میں ایک مثالی عملی نمونہ ہے اسی طرح اساتذہ کی قدر قابل رشک ہے۔ انہوں نے کہاکہ گلستان میں رنگین اور مختلف خوشبو کے پھول ہوتےہیں اسی طرح ہمارے بچے بھی مختلف صلاحیتوں کے مالک ہوتے ہیں ، بہت ہی فکر مندی کے ساتھ ان کی تربیت کرنے کی ضرورت ہے۔اس موقع پر ثقافتی اور کھیل مقابلوں میں جیت حاصل کرنے والے طلبا کے درمیان انعامات کی تقسیم ہوئی۔
اسکول کے صدرمدرس نثاراحمد نے سالانہ رپورٹ کی خواندگی کی،مولاناسعدان نے استقبال کیا۔ محمود گنگاولی نے نظامت کے فرائض انجام دئیے۔ جلسے کے انتظامات میں اسکول کے اساتذہ شریمتی انجنی نائک، شری پرکاش بھٹ اور جناب برہان فسٹ نے تعاون کیا۔ جلسے کے بعد اسکول طلبا کی طرف سے دلچسپ ثقافتی پروگرام پیش کئے گئے۔ ڈائس پر شہر کی معزز شخصیات منا زبیر، شیخ شبر، ظہور حاجی امین ، مولانا عبدالصمد، شیخ الیاس، محمد علی باشا،الیاس کالو، عبدالجبار حاجی بڈن موجود تھے۔