ممبئی،19 فروری(ایس او نیوز؍پریس ریلیز) مہاراشٹر کے اورنگ آباد اور ممبئی سے قریب مسلم آبادی والے ممبرا سے گرفتا ۹؍ مسلم نوجوانوں کو گذشتہ کل اورنگ آباد کی خصوصی یو اے پی اے عدالت نے عدالتی تحویل میں دیئے جانے کے احکامات جاری کیئے اور معاملے کی سماعت ۵ ؍ مارچ تک ملتوی کردی ، کل ملزمین کا چوتھا ر یمانڈ تھا اور اگر تمام ریمانڈ رپورٹس کا تجزیہ کیا جائے تو یہ بات واضح ہوتی ہیکہ ملزمین کو محض شک کی بنیاد پر گرفتارکیا گیا ہے ۔جمعیۃ علماء مہاراشٹر (ارشد مدنی) کی جانب سے اس معاملے میں گرفتار ملزمین ۱۔ سلمان خان ۔ محسن خان ۳۔ مظہر شیخ عبدالرشید ۴۔ محمد تقی ۵۔ محمد سرفراز عبدالحق عثمانی۶۔جمال نواب کا دفاع کرنے والے ایڈوکیٹ خضر پٹیل نے کہا کہ اے ٹی ایس نے ملزمین کے قبضوں سے کمپیوٹر، ہارڈ دیسک، موبائل، کیمیکل وغیرہ ضبط کرنے کا دعوی کیا تھا لیکن کل عدالت میں نہ تو فارینسک سائنس لیباریٹری کی رپورٹ پیش کی گئی اور نہ ہی عدالت کو یہ بتایا کہ گیا کہ ملزمین کے خلاف کیا پختہ ثبوت انہیں اب تک ہاتھ لگے ہیں۔ ایڈوکیٹ خضر پٹیل نے مزید بتایا کہ اے ٹی ایس کے پاس ملزمین کی مزید پولس تحویل میں لینے کا قانونی حق باقی تھا لیکن جب انہیں لگاکہ ملزمین کے قبضوں سے انہیں کچھ بھی حاصل نہیں ہورہا ہے تو انہوں نے بذات خود انہیں عدالتی تحویل میں دیئے جانے کی درخواست کی جسے عدالت نے قبول کرتے ہو ئے تمام ملزمین کو عدالتی تحویل میں منتقل کردیا۔ریمانڈ رپورٹ کا تجزیہ کرتے ہوئے ایڈوکیٹ خضر پٹیل نے کہا کہ تیسرے ریمانڈ کے موقع پر اے ٹی ایس نے عدالت کو بتایا تھا کہ انہیں ایک ملزم کے کشمیر کنیکشن کے تعلق سے تفتیش کرنا ہے لیکن چوتھے ریمانڈ میں کشمیر کنیکشن کا کہیں ذکر نہیں تھا ، اسی طرح دوسرے ریمانڈ میں ملزمین کے اکاؤنٹ میں بیرون ملک سے پیسہ آنے کا ذکر کیا گیا تھا لیکن تیسرے اور چوتھے ریمانڈ کے وقت اس تعلق سے عدالت کو کوئی معلومات نہیں دی گئی کہ آیا ملزمین کے اکاؤنٹ کی تفتیش میں انہیں کیا ہاتھ لگا اور کیا واقعی ملزمین کے اکاؤنٹس میں پیسے آئے تھے۔ایڈوکیٹ خضر پٹیل نے کہا کہ وہ اس معاملے میں جمعیۃ علماء مہاراشٹر قانونی امداد کمیٹی کے سربراہ گلزار اعظمی کی ہدایت پر ملزمین کے دفاع میں اول دن سے پیش ہورہے ہیں اور تمام ریمانڈ رپورٹس اور عدالت میں پیش کیئے گئے دستاویزات کا مطالعہ کرنے کے بعد انہیں لگتا ہے کہ ملزمین کو صرف اور صرف شک کی بنیاد پر گرفتار کیا گیا اور چار ریمانڈ مکمل ہوجانے کے بعد بھی اے ٹی ایس کے ہاتھ ملزمین کے خلاف کوئی پختہ ثبوت نہیں لگا ہے ۔ایڈوکیٹ خضر پٹیل نے کہا کہ یہ قانون کا تقاضہ ہیکہ ہمیں چارج شیٹ کا انتظار کرنا چاہئے ، چارج شیٹ ملزمین کو حاصل ہونے کے بعد اس کا مطالعہ کیا جائے گااور اس کے بعد ہی اگلا لائحہ عمل تیار کیا جائے گا۔واضح رہے کہ اے ٹی ایس نے ملزمین پر الزام عائد کیا ہیکہ وہ ممنو ع تنظیم داعش کے ہم خیال ہیں اور وہ ملک میں دہشت گردانہ کارروائیاں انجام دینا چاہتے ہیں ۔