نئی دہلی20نومبر(ایس او نیوز؍آئی این ایس انڈیا) کانگریس کی صدر سونیا گاندھی نے وزیراعظم نریندر مودی پر وعدہ پورے نہ کرنے کا الزام لگاتے ہوئے آج کہا کہ نوٹوں کی منسوخی اور جی ایس ٹی کی وجہ سے لوگوں میں پیدا ہوئی زبردست ناراضگی کی وجہ سے وہ پارلیمنٹ کا سرمائی اجلاس بلانے کی ہمت نہیں کرپارہے ہیں۔پارٹی کے اعلیٰ پالیسی تعین ادارہ کانگریس ورکنگ کمیٹی کی میٹنگ سے خطاب کرتے ہوئے محترمہ گاندھی نے کہاکہ نوٹوں کی منسوخی کے اعلان اور اشیا اور خدمات ٹیکس (جی ایس ٹی) کو غلط طریقہ سے نافذ کرنے کی وجہ سے کسان، مزدور، چھوٹے کاروباری، اور عام آدمی پریشان ہیں۔ملک کے عوام سے جو وعدے کئے گئے تھے مسٹر مودی انہیں پورا کرنے میں ناکام رہے ہیں اور سنگین بات یہ ہے کہ اس کے باوجود وہ اب بھی مسلسل کھوکھلے وعدے اور اعلانات کررہے ہیں۔