مودی سرکار ہٹاسکتی ہے بھینس کی فروخت پر پابندی؛ میگھالیہ میں بی جے پی کے اقتدار میں آنے کی صورت میں بیف کو سستا کرنے کا اعلان
نئی دہلی،29؍مئی(ایس او نیوز ؍ ایجنسی) مویشی بازاوں میں ذبیحہ کے لئے جانوروں کی فروخت پر پابندی عائد کرنے کے مرکزی حکومت کے فیصلے کے خلاف ایک طرف ملک کے مختلف حصوں میں آوازیں بلند کی جانے لگی ہیں، وہیں میگھالیہ میں بی جے پی کے ایک لیڈر نے اعلان کیا ہے کہ ریاست میں بی جے پی کے اقتدار میں آنے کی صورت میں بیف کی قیمت میں کمی کی جائے گی۔جنوبی ہندوستان کی کیرالہ ، تمل ناڈو اور بنگلور میں احتجاج کے ساتھ ساتھ اُدھر مغربی بنگال میں ممتا بنرجی نے مودی سرکار کے اس فیصلے کو غیر آئینی قرار دیتے ہوئے اُسے اپنی ریاست میں نافذ نہ کرنے کا اعلان کیا ہے۔
متعدد ریاستوں میں مودی سرکار کے فیصلے کی مخالفت کے پیش نظر اب مودی حکومت جانوروں کے میلہ میں جانوروں کی خرید و فروخت پر لگائی گئی پابندی کے حکم پر نظر ثانی کرنے کی توقع ظاہر کی جارہی ہے۔بتایا جارہا ہے کہ مودی حکومت اس قانون میں کچھ راحت دیتے ہوئے نو سلاٹرلسٹ سے بھینسوں کو باہر نکال سکتی ہے۔
ماحولیات کی وزارت کے سکریٹری اے این جھا کے مطابق نئے جانور ذبیحہ قوانین میں کچھ مخالفتیں سامنے آئی ہیں، ہم ان پر کام کر رہے ہیں، حکومت کی سلاٹر لسٹ میں جن جانوروں کو شامل کیا گیا ہے، ان میں گائے، بیل، بھینس، بچھیا ،بچھڑا اور اونٹ ہے۔ حکومت کے نئے حکم کے بعد ذبیجہ کے لئے جانور میلوں میں ان کی خرید و فروخت نہیں کی جا سکتی ہے۔ حکومت کے اس پابندی کا کیرالہ، مغربی بنگال جیسی ریاستیں شدید مخالفت کر رہی ہیں۔
خیال رہے کہ ماحولیات اور جنگلات کی وزارت نے 26 مئی کو ذبح کے لئے جانور میلوں میں جانوروں کی خرید و فروخت پر پابندی لگا دی تھی ۔مرکزی حکومت کی طرف سے بنایا گیا اصول اگلے تین ماہ میں نافذ ہونا ہے۔ مودی حکومت کے اس قانون کو لے کر کیرالہ میں مخالفت تیز ہوگئی ہے۔ کیرالہ حکومت نے اس کو ماننے سے انکار کر دیا ہے۔ کیرالہ حکومت کا کہنا ہے کہ مرکز کے اس فیصلے سے چمڑہ تجارت متاثر ہوگی ۔کیرالہ کے علاوہ مغربی بنگال حکومت اور تمل ناڈو کی ڈی ایم کے نے بھی حکومت کے اس فیصلہ کی شدید مخالفت کی ہے۔ مغربی بنگال کی وزیر اعلی ممتا بنرجی نے اسے غیر آئینی قرار دیتے ہوئے اس فیصلہ کو نافذ کرنے سے انکار کر دیا ہے۔
ملک کی بعض ریاستوں میں بیف پر پابندی کے خلاف احتجاج کے پیش نظر میگھالیہ میں آج ایک بی جے پی لیڈر نے کہا ہے کہ اگر اس ریاست میں بی جے پی اقتدار میں آگئی تو بیف پر پابندی لگانے کی بجائے بیف کی قیمت میں کمی جائے گی تا کہ غرباء کی ضرورت پوری ہوسکے۔ بی جے پی لیڈر برنارڈ مارک نے کہا کہ بی جے پی بیف کے علاوہ دوسرے گوشت کی قیمتوں کو بھی منضبط کرے گی اور گاروہلس علاقوں میں مذبحہ کو قانونی حیثیت دی جائیگی ۔