لکھنؤ :15/جولائی(ایس او نیوز/آئی این ایس انڈیا)اترپردیش کانگریس کمیٹی نے نریندر مودی پر حملہ بولتے ہوئے کہا کہ وزیر اعظم نریندر مودی سرکاری خرچے پر بی جے پی کے لئے انتخابی تشہیر کرتے ہیں۔یوپی کانگریس کمیٹی نے ایک بیان میں کہا ہے کہ نریندر مودی ملک میں دو دوروں کے لئے جانے جاتے ہیں ایک خارجہ دورہ دوسرا انتخابی دورہ۔ جب سے مودی وزیر اعظم بنے ہیں تبھی سے پورے ملک میں صرف بی جے پی کی ہی تشہیر کے لئے جاتے ہیں۔ ریاستوں کے بنیادی مسائل سے انہیں کوئی مطلب نہیں رہتا اور سرکاری اخراجات پر بی جے پی کے لئے انتخابی تشہیر کرتے ہیں۔پوروانچل ایکسپریس کے ضمن میں کانگریس پارٹی نے کہا ہے کہ جو سڑک پوروانچل بلیا تک جانی تھی اسے غازی پور تک لے جانے کا کیا جواز ہے۔ بی جے پی نے اپنا جھوٹا چہرہ عوام کے سامنے رکھا کہ انہوں نے سابقہ حکومت کے منصوبہ میں ہونے والے اخراجات میں 1100کروڑ کم خرچ کیا۔کانگریس نے کہا ہے کہ نریندر مودی کی یہ خصوصیت ہے کہ وہ پیشرو منصوبوں کا نئے سرے سے افتتاح کرتے ہیں، جس کی تازہ مثال لکھنؤ میٹرو اور لکھنؤ آگرہ ایکسپریس وے ہے، اسی کڑی میں یہ پوروانچل ایکسپریس وے بھی ہے۔ پارٹی نے یہ بھی کہا ہے کہ مودی حکومت نے گزشتہ 4 برسوں میں صرف دو کام کئے ہیں جس میں سے ایک نامکمل کام دہلی میرٹھ ایکسپریس وے ہے جس کا صرف 10 فیصد کام ہوا، اس کا افتتاح بھی کر دیا گیا؛لیکن بدقسمتی یہ کہیے کہ پہلی بارش میں ہی اس کی قلعی بھی کھل گئی جو بی جے پی کے عوامی ’’خدمات‘‘ کا کچا چٹھا بیان کرتی ہے ۔