منگلورومیں بزنس مین پر حملہ اور لوٹ کا معاملہ۔ دوملزمین گرفتار ۔لوٹے گئے16.57لاکھ روپے برآمد
منگلورو 9؍ستمبر (ایس او نیوز) شہر کے بیجائی علاقے میں سری رام بھجنا مندر کے پاس 20اکتوبر کو بزنس مین پر حملہ کرکے 27لاکھ روپے لوٹنے کا جو واقعہ پیش آیا تھا، اس کیس کو حل کرنے میں پولیس کو کامیابی ملی ہے اور اس نے دوملزمین کو گرفتار کرتے ہوئے ان کے پاس سے لوٹی گئی رقم کا ایک حصہ 16.57لاکھ روپوں کے علاوہ 17,17,000مالت کی دیگر اشیاء برآمدکر لی ہے۔پولیس نے ملزمین کی موٹر بائک بھی ضبط کرلی ہے۔
پولیس نے گرفتار شدہ ملزمین کی شناخت محمد شفیع(26سال) اورمحمد ریاض (19سال) بتائی ہے۔یاد رہے کہ 20اکتوبر کی شام کو گنیش کامتھ نامی تاجر جب اپنے گھر کی طرف جارہاتھا تو کچھ لوگوں نے اس پر حملہ کرکے اس کی بیاگ چھین لی ہے جس کے اندر 27لاکھ روپے موجود تھے۔کامتھ کے بیان کے مطابق لٹیروں نے اسے جان سے مارنے کی دھمکی دی تھی اس لئے اس نے خوف کے مارے یہ کہانی گھڑی تھی کہ حادثے میں اس کی بیاگ گم ہوگئی ہے۔ بعد میں پولیس نے اس بات کا سراغ لگالیا کہ دراصل یہ ایک لوٹ کی واردات ہے۔سنٹرل اینٹی راؤڈی اسکواڈ کے انسپکٹر رویش ایس نائیک کی قیادت میں تشکیل دی گئی ٹیم نے اس کیس کو حل کرلیا اور ملزمین کو اپنی حراست میں لے لیا۔
پولیس کے بیان کے مطابق اس ڈکیتی کے منصوبہ ساز بیلتھنگڈی کا رہنے والا محمد شفیع پر بیلتھنگڈی پولیس اسٹیشن کے حدود میں چوری کے چار معاملات اور پتور پولیس اسٹیشن میں عصمت کا ایک کیس درج ہے ۔ اس کے علاوہ پانڈیشور، اوروا، کدری اور کوور پولیس اسٹیشن میں مختلف جرائم کے لئے اس پر کیس درج ہیں۔ محمد ریاض کے بارے میں معلوم ہوا ہے کہ وہ چھوٹی موٹی چوریوں کے معاملات میں محمد شفیع کا ساتھ نبھایا کرتا ہے۔