نئی دہلی،12؍اگست(ایس او نیوز؍آئی این ایس انڈیا) مہاراشٹر حکومت میں شیو سینا کے کوٹے سے وزیر سبھاش دیسائی نے استعفیٰ کی پیشکش کی ہے لیکن وزیر اعلی دیویندر فڑنویس نے استعفی لینے سے انکار کر دیا۔ وزیر صنعت سبھاش دیسائی پر بلڈر کو فائدہ پہنچانے کے لئے ناسک میں ایم آئی ڈی سی کی جگہ ڈنوٹیفائڈ کرنے کا الزام ہے، اگرچہ جمعہ کو ہی وزیر اعلی نے اسمبلی میں تحقیقات کی یقین دہانی کرائی تھی۔ بقول سبھاش دیسائی وزیر اعلی نے یہ کہہ کر استعفی منظور کرنے سے انکار کر دیا کہ تحقیقات کا اعلان ہو چکا ہے، تحقیقات میں جو سامنے آئے گا اس کے بعد مناسب فیصلہ لیا جائے گا۔خاص بات یہ ہے کہ بی جے پی کے وزیر پرکاش مہتا پر بھی بدعنوانی کا الزام ہے۔ اپوزیشن 10 دن سے پرکاش مہتا کے استعفیٰ کامطالبہ کر رہا ہے لیکن نہ تو پرکاش مہتا نے استعفی دیا اور نہ ہی وزیر اعلی نے اب تک مانگا ہے۔ کل ہی دونوں پر لگے الزامات کی لوک آیکت سے جانچ کا اعلان کیا گیا۔