ممبئی ،15؍ ستمبر (ایس او نیوز؍آئی این ایس انڈیا) مہاراشٹر میں سال 2019میں ہونے والے لوک سبھااور اسمبلی انتخابات میں دلت و مسلم ووٹوں کی گول بندی کے لئے آل انڈیا مجلس اتحاد المسلمین (اے آئی ایم آئی ایم) اوربھاریپا بہوجن مہاسنگھ میں اتحاد کی تیاریاں مکمل ہو چکی ہیں۔

اورنگ آباد میں ان دونوں پارٹیوں کے رہنما اسد الدین اویسی اور پرکاش امبیڈ کر کی 2اکتوبر کو میٹنگ ہو گی اور اسی روز دنوں رہنماایک ساتھ عوامی جلسہ سے خطاب کریں گے۔ یہ اطلاع ایم آئی ایم کے ایم ایل اے امتیاز جلیل نے دی۔ جلیل نے بتایا کہ اس سلسلہ میں دونوں رہنماؤں کی میٹنگ پرکاش امبیڈکر کی رہائش گاہ پر ہو چکی ہے اور آئندہ انتخابات ساتھ لڑنے پر مہر لگ چکی ہے۔ ریاست میں دلت و مسلم ووٹوں کی گول بندی کا سب سے زیادہ نقصان کانگریس اور نیشنلسٹ کانگریس پارٹی(این سی پی)کو ہونے کے امکانات ظاہر کئے جا رہے ہیں۔ اس کی وجہ یہ ہے کہ یہ دونوں اب تک کانگریس کے ہی روایتی ووٹ بینک رہے ہیں۔ حالانکہ اب یہ ووٹ بینک کانگریس سے ناراض ہو کر کئی سیاسی جماعتوں میں منقسم ہو گیا۔ اس سے کانگریس کمزور تو ہوئی ہے لیکن اس ووٹ بینک کو متحد کرنے کے لئے اویسی اور پرکاش امبیڈنگر نیااتحاد بنارہے ہیں۔

بتادیں کہ اویسی کی ایم آئی ایم کے ریاست میں دو ایم ایل اے ہیں ۔ اسی طرح اورنگ آباد مہانگر پالیکا میں ایم آئی ایم کے 25نگر سیوک ہیں۔ پرکاش امبیڈکر کی طاقت ودربھ کے 11اضلاع میں ہے۔ اس لئے اگر یہ اتحاد کامیا ب ہوا تو یہ کانگریس ہی نہیں بی جے پی او رشیوسینا کے لئے بھی چیلنج پیش کر سکتا ہے ۔ اس کی وجہ کانگریس سے ٹوٹا یہ ووٹ بینک ان دونوں جماعتوں کی جانب متوجہ ہو ا ہے۔