نئی دہلی،19 مارچ (ایس او نیوز؍آئی این ایس انڈیا) لوک سبھا انتخابات کے لئے عام آدمی پارٹی نے اب تک کانگریس سے اتحاد کی امیدیں نہیں چھوڑی ہے۔

عام آدمی پارٹی اور کانگریس کے درمیان اتحاد کے لئے این سی پی سربراہ شرد پوار ثالثی کر رہے ہیں۔اس دوران دہلی کانگریس کے سربراہ اور سابق وزیر اعلی شیلا دیکشت نے کہا کہ وہ عام آدمی پارٹی سے اتحاد کے خلاف ہیں، لیکن وہ پارٹی کے فیصلے کے ساتھ ہی جائیں گی۔شیلا دکشت نے کہاکہ میں اتحاد کے خلاف ہوں، لیکن میں پارٹی کے فیصلے کے ساتھ جاؤں گی۔میں نے اس فیصلے کو کانگریس اعلی کمان پر چھوڑ دیا ہے۔

کانگریس صدر جو بھی طے کریں گے میں اس کے ساتھ جاؤں گی۔حالانکہ مجھے یقین ہے کہ کانگریس اپنے دم پر الیکشن لڑنے کی پوزیشن میں ہے۔شیلا دکشت کا یہ بیان شرد پوار کی ثالثی کے بعد آیا ہے۔ وہیں ذرائع کے حوالے سے خبر ہے کہ عام آدمی پارٹی نے شرد پوار کے ذریعے کانگریس کو تین ریاستوں میں اتحاد کی تجویز بھجوائی ہے۔ ذرائع کے مطابق عام آدمی پارٹی نے کانگریس کو یہ پیشکش بھجوائی ہے کہ دہلی میں عام آدمی پارٹی کے 5 اور کانگریس 2 سیٹوں پر انتخاب لڑے۔وہیں پنجاب میں عام آدمی پارٹی 3 اور کانگریس کو 10 سیٹیں دی جائیں گی۔اس کے علاوہ ہریانہ میں عام آدمی پارٹی 2 سیٹوں پر لڑے گی، وہیں کانگریس کو 4 اور جے جے پی کو 4 سیٹیں دی جائیں گی۔

واضح رہے کہ گزشتہ ہفتے پارٹی اعلی کمان کو لکھے گئے خط میں دکشت اور ایگزیکٹو چیئرمین ہارون یوسف، دویندریادو اور راجیش للوٹھیا نے اتحاد پر کارکنوں کا موڈ جاننے کے لئے فون سروے پر اعتراض کیا ہے۔دہلی کانگریس کے ایک لیڈر نے بتایاکہ دکشت اور ایگزیکٹو صدرنے کانگریس سربراہ سے گزارش کی ہے کہ وہ آپ سے اتحاد نہ کریں کیونکہ یہ آگ چل کر پارٹی کو نقصان پہنچائے گی ۔ساتھ ہی لیڈر نے کہا کہ انہوں نے پارٹی کے شکتی ایپ کے ذریعے کئے گئے فون سروے پر بھی اعتراض ظاہر کیا ہے۔یہ سروے دہلی کانگریس کے اے آئی سی سی انچارج پی سی چاکو نے کرایا ہے۔سروے میں دہلی کانگریس کے تقریباً52,000کارکنوں کی رائے مانگی گئی تھی کہ کیا پارٹی کو آپ سے اتحاد کرنا چاہئے یا نہیں۔