یوپی میں دلتوں کومتحد کرنے میں کانگریس مصروف، پرینکا گاندھی نے خصوصی ٹیم تشکیل کی
لکھنؤ، 20 فروری(ایس او نیوز؍آئی این ایس انڈیا) لوک سبھا انتخابات سے پہلے پرینکا گاندھی کے کانگریس کا جنرل سکریٹری بننے کے بعد پارٹی اتر پردیش میں فرنٹ فٹ پر الیکشن لڑنے کی تیاری میں ہے اور اس کے لئے وہ تابڑ توڑ حکمت عملی بنانے میں لگ گئی ہے۔ وہیں جنرل سکریٹری کا عہدہ سنبھالنے کے بعد پرینکا گاندھی نے اتر پردیش میں کانگریس کو مضبوط بنانے کے لئے سارے داؤ پیچ آزمانے شروع کر دئے ہیں،اب انہوں نے یوپی میں دلتوں کو متحد کرنے کے لئے خصوصی ٹیم تشکیل دی ہے۔
دلتوں کو متحد کرنے کے لئے قائم کی گئی اس خصوصی ٹیم میں قریب 35 لوگوں کو شامل کیا گیا ہے۔اس ٹیم کا کام ان لوک سبھا حلقوں میں دلت پر کام کرنے کا ہوگا جہاں پر دلتوں کی تعداد 20 فیصد یا اس سے زیادہ ہے۔اس کے لئے صوبہ کانگریس کے ایس سی سیل کاکارف سے ڈیٹا بھی لیاہے۔معلومات کے مطابق کانگریس کی یہ ٹیم بڑے پیمانے پر عوامی تعلقات، جلسے اور سوشل میڈیا مہم کے ذریعے دلتوں سے رابطہ کرے گی۔اس ٹیم’ یوپی‘ کی قیادت پسماندہ ذات شعبے کے ترجمان ایس پی سنگھ کریں گے،ابھی اس ٹیم نے 40 سیٹوں کو منتخب کیا ہے جس میں سے 17 نشستیں ریزرو زمرے کی ہیں۔اس ٹیم کی پہلی توجہ اس بات پر ہوگی کہ دلت بھارتیہ جنتا پارٹی (بی جے پی) کے حق میں نہ چلے جائیں۔اس ٹیم میں شامل لوگوں میں راج کمل، مشرقی زون کے انچارج کے طور پر سریش کمار اور راجداپ سندھو، مغربی زون کی کمان شورام سنگھ اور پرنس کٹاریا، بندیل کھنڈ کا چارج نوین موریہ اور گوپال دیول کودیا گیا ہے۔ساتھ ہی ان لوگوں کے ساتھ کام کرنے کے لئے کانگریس نے قریب ایک ایک درجن پرانے کانگریسی کارکنوں کو لگایا ہے تاکہ دلت ووٹروں کو سمجھانے میں کہیں کوئی بھی چوک نہ ہو جائے۔
دوسری طرف وزیر اعظم نریندر مودی 27 فروری کے کانگریس صدر راہل گاندھی کے گڑھ امیٹھی میں دورے پر رہیں گے۔دو دن کے اس دورے میں مودی سونیا اور راہل کو انہیں کے پارلیمانی حلقہ میں گھیرنے کی تیاری کریں گے۔وزیر اعظم مودی سرکاری پروگرام میں حصہ لینے کے علاوہ ایک جلسے سے بھی خطاب کریں گے۔وزیر اعظم امیٹھی کے کوربا میں ایچ اے ایل میں آرڈیننس فیکٹری میں نئی رائفل فیکٹری کا افتتاح کریں گے۔اس فیکٹری میں اے 103 رائفل تیار کی جائیں گی۔