نئی دہلی:8/ اگست (ایس او نیوز/آئی این ایس انڈیا)سپریم کورٹ نے بدھ کے روز جموں وکشمیر حکومت کو نوٹس جاری کرکے سنسنی خیز کٹھوعہ اجتماعی عصمت دری اور قتل کے معاملہ میں اہم گواہ طالب حسین کے گھروالوں کی داخل کردہ حبس بے جا کی عرضی پر تفصیلی جواب طلب کیاہے ۔چیف جسٹس دیپک مشرا،جسٹس اے ایم کھانولکر اور ڈی وائی چندرچوڑ پر مشتمل تین ججوں کی بنچ نے طلاب حسین کے گھروالوں کی طرف سے داخل کردہ حبس بے جا کی عرضی پر سماعت کرتے ہوئے جموں کشمیر حکومت کو نوٹس جاری کیا ۔عدالت عظمی نے سینئر وکیل اندراجے سنگھ کی یہ درخواست منظور کرلی کہ حسین کو پولیس کی تحویل میں بری طرح سے زدوکوب کیاگیاہے اور یہ کہ عدالتی مداخلت کی ضرورت ہے ۔