بھٹکل:9/ اکتوبر (ایس اؤنیوز)فلمی دنیا کے مشہور اداکار پرکاش رائی نے بیان جاری کرتےہوئے اترپردیش کے وزیراعلیٰ یوگی آدتیا ناتھ کو پجاری اور اپنے سے بڑا اداکار کہتے ہوئے مذاق اُڑائے  جانے کو لے کر بھٹکل کے   ناتھ پنتھ جوگی سماج کے ریاستی صدر ڈاکٹر کیشوؤ کوٹیشور نے مذمت کی ہے۔

پیر کی شام خانگی ہوٹل میں پریس کانفرنس کے ذریعے بات کرتےہوئے انہوں نے کہاکہ یوگی آدتیاناتھ ناتھ پنتھ طبقے کے پیروکار اور ایک سنت ہیں، اپنی 25سالہ سیاسی زندگی میں کوئی بھی بڑی حکومتی سہولیات حاصل نہیں کی ہیں، حالیہ اپنے منگلورو دور ے کے دوران معمولی بستر پر سوکر اپنی سادگی ظاہر کی ہے۔ سنت آدتیا ناتھ پر اعتماد کرنے والے ناتھ پنتھ کے کروڑوں پیروکار ہیں، ایک اعلیٰ مقام پر فائز شخصیت کے متعلق پرکاش رائی اپنی تشہیر کے لئے اُن کا مذاق اُڑایا ہے، جس سے ہمیں شدید رنج پہنچا ہے۔

پرکاش رائی کو شیورام کارنت ایوارڈ سے نوازاجارہاہے ، جب کہ شیورام کارنت ملحد تھے یعنی انہوں نے بھگوان کا انکار کیا تھا، اس کے باوجود انہوں نے کبھی کسی کے خلاف بیان بازی نہیں کی۔ڈاکٹر کیشوئو نے اس موقع پر اس بات کا اعلان کیا کہ  منگل کو ایوارڈ حاصل کرنے کوٹاپہنچنے والے  پرکاش رائی کے خلاف سیاہ جھنڈے  دکھائیں جائیں گے اور  خاموش احتجاج کیا جائے گا۔

پریس کانفرنس میں جوگی سماج کے ذمہ داران شیورام بلگار، رمیش جوگی ہیماڑی ، رام ناتھ بلگار وغیرہ وموجود تھے۔