نئی دہلی:28/اپریل(ایس او نیوز /آئی این ایس انڈیا) مصطفی آبادمیں واقع جامعہ عربیہ بیت العلوم کی شاخ میں آج ’انجمن بزم غفار‘کے اختتامی اجلاس میں طلبا کو اپنی زبان کی اصلاح اور اور اُس کے صحیح استعمال پر زور دیتے ہوئے اجلاس کے صدر اور جامعہ کے بانی قاری عبدالغفار نے کہا کہ تبلیغ ِدین اور دعوت ِحق کے مشن میں سچی زبان کا استعمال ناگزیر ہے اور طویل المدت حکمت عملی اور سچی وحلاوت آمیز زبان کے استعمال سے ہی ہم اس عظیم مشن کو کامیاب بناسکتے ہیں۔غور طلب ہے کہ جامعہ کے طلبا کی تقریری وتحریری صلاحیتوں کو جلا بخشنے کے لیے بزم غفار کے نام سے تجربہ کار اساتذہ کی نگرانی میں ایک انجمن قائم ہے جو طلبا کے مابین مسابقاتی پروگرام کا انعقاد کرتی ہے۔آج کے اختتامی اجلاس میں حکم کے طور مولانا ذاکر امام نور مسجد اور مولانا شاکرامام عائشہ مسجد نے شرکت کی اور اول،دوئم اور سوئم پوزیش حاصل کرنے والے طلبا کو انعامات سے نوازا، جب کہ پروگرام کی نظامت مولوی سعید انور نے کی۔آج کے پروگرام میں مولانا جمشید،مولانا صداقت قاسمی،مولانا امان اللہ قاسمی،مفتی حیدر،مولانا عبداللہ،مولانا عبدالمقتدر،قاری وسیم،قاری انس،قاری فاروق،مولانا عبدالستار کے علاوہ جامعہ کے تمام اساتذہ وطلبا نے شرکت کی۔