جاٹوں کے خلاف مقدمات واپس لینے پر اندرون خانہ ہی تنازعہ، سجدہ ریز ہوتی ہریانہ سرکار پر پارٹی کے ایم پی نے اٹھایا سوال
نئی دہلی 14فروری ( ایس او نیوز؍آئی این ایس انڈیا )جاٹوں کے خلاف 70سے زائدکیسز واپس لینے پر بی جے پی کے صدر امیت شاہ کی ریلی سے پہلے رہنما راج کمار سینی نے اپنی ہی حکومت کے خلاف محاذ کھول کر اندرون خانہ سراسیمگی پھیلادی ہے ۔ واضح ہو کہ انہوں نے آل انڈیا جاٹ ریزرویشن سنگھرش سمیتی کی تحریک کی انتباہ کے درمیان ہریانہ حکومت کی طرف سے جاٹوں پر ریکارڈ 70 سے زائد کیس واپس لینے پر سوال اٹھائے ہیں۔ رہنما راج کمار سینی کا کہنا ہے کہ یہ انتہائی حساس معاملہ ہے، حکومت کو دباؤ میں آکر جاٹوں کے اوپر درج کیس واپس نہیں لینے چاہئے. انہوں نے کہا کہ اس سے ریاست کی دیگر 35 برادری کے لوگوں کے سامنے حکومت کے تئیں غلط پیغام جا رہا ہے۔ واضح ہوکہ جاٹوں کے خلاف درج 70 مقدمات کو واپس لینے سے 822 لوگوں کو راحت ملے گی، پہلے بھی تقریبا 200 مقدمے واپس لیے جا چکے ہیں۔غور طلب ہے کہ ہریانہ کی کھٹر حکومت نے فروری 2016 میں جاٹ تحریک کے دوران واقع تشدد کے سلسلے میں درج تمام معاملات کو واپس لینے کا فیصلہ لیا ہے۔ کچھ دن پہلے جاٹ لیڈروں کے ساتھ ملاقات کے بعد وزیر اعلیٰ منوہر لال کھٹر نے یہ اعلان کیا۔ اس کے بعد ہی جاٹ تنظیم نے 15 فروری کو جیند میں ہونے والی ریلی ملتوی کر دی تھی ،دراصل اسی دن امیت شاہ جیندمیں ایک موٹر سائیکل ریلی کرنے والے ہیں، جاٹ تنظیم نے امیت شاہ کی ریلی نہ ہونے دینے کا اعلان کیا تھا، جس سے کھٹرسرکارخوف زدہ ہوکر یہ فیصلہ لینے پر مجبور ہوگئی ۔