فرضی پاسپورٹ معاملے میں گینگسٹر چھوٹا راجن کو 7سال کی سزا
نئی دہلی:25/اپریل (ایس او نیوز/آئی این ایس انڈیا)خصوصی عدالت نے گینگسٹر چھوٹا راجن اور دیگر کو فرضی پاسپورٹ معاملے میں 7سال کی سزا سنائی ہے۔اس سے قبل چھوٹا راجن اور تین دیگر ریٹائرڈ نوکرشاہوں کو ایک خصوصی عدالت نے فرضی ہندوستانی پاسپورٹ بنوا کر حکومت کو ٹھگنے کے معاملے میں پیر کو مجرم ٹھہرایا گیا تھا۔خصوصی جج وریندر کمار گوئل نے تین ریٹائرڈنوکرشاہ، جے شری دتاتریہ رہاتے، دیپک نٹورلال شاہ اور للتا لکشمن کو مجرمانہ سازش کے ذریعہ فرضی پاسپورٹ حاصل کرنے میں راجن کی مدد کرنے کا مجرم قرار دیا تھا۔فیصلہ سنانے کے فورا بعد عدالت نے تینوں نوکرشاہوں کو فوری طور پر حراست میں لینے کو کہاہے۔عدالت کے کمرے میں موجود تینوں نوکر شاہ رو پڑے، تینوں فی الحال ضمانت پر باہر ہیں۔فی الحال عدالتی حراست میں تہاڑ جیل میں بند 55سالہ راجن عرف راجندر سداشیو نکلجے سیکورٹی وجوہات کی وجہ سے ویڈیو کانفرنسنگ کے ذریعے عدالت میں پیش ہوئے تھے۔چاروں کو تعزیرات ہند کے تحت دھوکہ دہی، فرضی دستاویزات کا استعمال اصلی کے طور پر کرنے، ٹھگی کے لیے جعل سازی کرنے، اہم سیکورٹی دستاویزات یا وصیت کی فرضی نقل کرنے، بھیس بدل کر ٹھگی کرنے اور مجرمانہ سازش رچنے اور پاسپورٹ قانون کی دیگر دفعات کے خلاف ورزی کا مجرم قرار دیا گیا ہے۔