چار مکتوب کے ذریعے بہار کے ووٹر تک پہنچیں گے لالو پرساد یادو
پٹنہ:9/دسمبر (ایس او نیوز/آئی این ایس انڈیا)2019 لوک سبھا انتخابات کا بگل بجنے میں صرف چند ماہ باقی ہیں، ایسے میں اب آر جے ڈی کو ان سربراہ لالو پرساد یادو کی کمی محسوس کی جارہی ہے ۔ آر جے ڈی بہار میں لوک سبھا انتخابات کی تیاری میں لگ گئی ہے اور اجلاسوں کا دور جاری ہے، لیکن ہر تیاری کے درمیان لالو یادو کی غیر موجودگی سب کو محسوس ہو رہی ہے۔ اسی کے تحت پٹنہ میں آر جے ڈی کے پارٹی عہدیداروں کی میٹنگ ہوئی، جس میں اس بات کا فیصلہ کیاگیا کہ آنے والے دنوں میں لالو پرساد یادو بہار کے تمام ووٹروں سے روبرو ہوں گے؛ لیکن اس وقت وہ خود نہیں بلکہ چار خطوط کے ذریعے ان تک پہنچیں گے۔ پارٹی کی میٹنگ میں ہی ہفتہ کو اس بات کا فیصلہ لیا گیا کہ ریاست کی تمام پنچایتوں میں جلد ’لالوسندیش چوپال ‘لگایا جائے گا۔ جہاں لالو کے چار مکتوب کو عوام کے لئے پڑھا جائے گا۔ ذرائع کے مطابق لالو پرساد یادو کو چارہ گھوٹالے کے معاملے میں جیل میں بند ہیں اور فی الحال رانچی کے ہسپتال میں اپنا علاج کروا رہے ہیں۔ انہوں نے اپنے ووٹروں کے لئے چار خط لکھا ہیں۔ ان خطوط میں لالو نے اپوزیشن پارٹیوں کی سازش کا ذکر کیا ہے۔ لالو اپنے ووٹروں کو خط کے ذریعے یہ بتانا چاہتے ہیں کہ کس طرح مخالفین نے انہیں چارہ گھوٹالے کے معاملے میں سازش کے تحت پھنسایا ہے ۔ ان خطوط میں لالو نے اپنے ووٹروں کو پیغام دینا چاہا ہے کہ آئندہ لوک سبھا انتخابات میں ملک میں بی جے پی اتحاد کو کس طرح سے شکست کرنا ہے۔اس کو لے کر بھی پارٹی کارکنوں اور عوام کو’’ منتر‘‘ دیا جائے گا۔آر جے ڈی ریاستی صدر رام چندر پوروے کی صدارت میں پارٹی عہدیداروں کے اجلاس میں یہ فیصلہ کیا گیا کہ’’ لالو سندیش چوپال‘‘ کو تمام پنچایتوں میں کامیاب بنانے کے لئے پارٹی کے تمام لیڈر زور شور سے لگ جائیں اور گاؤں گاؤں کا دورہ کریں۔