تمل ناڈو :غزہ طوفان میں 23 افراد ہلاک
چنئی،16؍ نومبر (ایس او نیوز؍آئی این ایس انڈیا) گردابی طوفان ’غزہ‘تمل ناڈو کے ناگاپٹنم،تجاور اور ترووارور اضلاع کو جمعہ کی صبح پارکرتے ہوئے خطرناک شکل اختیار کرگیا اور اس میں ہوئے مختلف حادثوں میں 23افراد کی موت ہوگئی۔موصول اطلاع کے مطابق تنجاور میں طوفان اور بارش سے ہونے والے حادثوں میں 10افراد کی موت ہوئی ہے اور ترووارور میں چار،تنجاور میں تین،تریچی میں دو،ناگاپٹنم،کڈا لور اور ترو اناملئی میں ایک ایک شخص کی موت کی خبر ہے۔وزیر اعلی ای کے پلانی سوامی نے ان حادثات میں مارے گئے افراد کے لواحقین کو دس دس لاکھ روپے کی مالی مدد فراہم کرنے کا اعلان کیا ہے۔انہوں نے بتایا کہ طوفان سے متاثر علاقوں میں راحت اور بچاؤ کاموں کی نگرانی کیلئے ریاستی حکومت کے وزیر کیمپ کررہے ہیں۔انہوں نے متاثرہ علاقوں میں بجلی اور پانی کی سپلائی بحال کرنے کیلئے عوامی فلاح و بہبود کے محکمے،بجلی محکمے اور راحت اور بچاؤ کے انتظامات کرنے والے محکمے کو جنگی سطح پر کام کرنے کیلئے کہاہے۔