کلگام تصادم میں پانچ دہشت گرد ہلاک، موبائل انٹرنیٹ و ریل خدمات معطل
جموں ،15؍ ستمبر (ایس او نیوز؍آئی این ایس انڈیا)جموں و کشمیر کے کلگام ضلع کے قاضی گنڈ کے چوگام علاقہ میں ہفتہ کی صبح ہوئے تصادم میں سیکورٹی دستوں نے 5دہشت گردوں کومار گرایا ہے۔ اس دوران فوج کے دو جوان زخمی ہو گئے جنہیں علاج کے لئے فوجی اسپتال میں داخل کروایا گیا ہے۔ مارے گئے دہشت گردوں کی شناخت گلزار احمد پاڈر ساکن پوبے کلگام، فیصل راتھر ساکن یمراج کلگام، زاہد احمد میرساکن اوکے کلگام، مسروربھٹ ساکن فتح پورہ اننت ناگ اور ظہور ساکن نورآباد کلگام کے طور پر ہوئی ہے۔ مارے گئے دہشت گردوں کے پا س سے کافی تعداد میں گولہ بارود بھی برآمد ہو ا ہے۔ مارے گئے دہشت گرد حزب المجاہدین اور لشکر طیبہ سے وابستہ ہیں۔ موصولہ اطلاعات کے مطابق کلگام ضلع کے قاضی گنڈ کے چوگام علاقہ میں سیکورٹی دستوں کی موجودگی کی اطلاع ملی۔ اس کے بعد فوج، پولس اور سی آر پی ایف کی ایک مشترکہ ٹیم نے پورے علاقہ کو گھیر کر دہشت گردوں کی گرفتاری کے لئے تلاشی مہم چلائی۔ اس دوران سیکورٹی دستوں کو قریب آتا دیکھ کر دہشت گردوں نے گولہ باری شروع کر دی جس کے بعد تصادم شروع ہو گیا۔ کافی دیر تک چلے اس تصادم میں سیکورٹی دستوں نے پانچ دہشت گردوں کو مار گرایا ہے جبکہ اس دوران فوج کے دو جوان بھی زخمی ہو گئے ہیں۔ تصادم ختم ہو گیا ہے۔ دہشت گردوں کے مارے جانے کی خبر ملتے ہی مقامی نوجوان تصادم کی جگہ پر پہنچ گئے اور سیکورٹی دستوں پر پتھر بازی شروع کر دی۔ سیکورٹی دستوں نے بھیڑ کو منتشر کرنے کے لئے آنسو گیس کے گولے داغے اور لاٹھی چارج کیا جس کے بعد پرتشدد جھڑپیں شروع ہو گئیں۔ پرتشدد جھڑپوں کے خدشہ کے پیش نظر انتظامیہ نے کلگام کے کئی علاقوں میں موبائل انٹرنیٹ خدمات اور ریل سروس کو بھی منسوخ کردیا ہے۔