نئی دہلی، 28؍اگست(ایس او نیوز/آئی این ایس انڈیا)اعلی تعلیم کے میدان میں ملک کا ممتازہ ادارہ جواہر لال نہرو یونیورسٹی(جے این یو)گزشتہ چند دنوں سے موضوع بحث بنا ہوا ہے اور ایک عام تاثر یہ ہے کہ یہاں نظم و ضبط میں کافی نرمی برتی جاتی ہے لیکن ایک آر ٹی آئی سے پتہ چلا ہے کہ یہاں گزشتہ ساڑھے 6 سالوں کے دروان ہر ماہ اوسطا تقریبا 7طلبا کے خلاف مختلف قوانین کی خلاف ورزی کرنے پر تادیبی کارروائی کی گئی اور جرمانہ بھی عائد کیا گیا۔ حق اطلاعات قانون (آر ٹی آئی) کے تحت جے این یو کے مرکزی پبلک انفارمیشن آفیسر کے دفتر سے حاصل کردہ معلومات کے مطابق، 2010سے جون 2016کے درمیان ڈسپلن شکنی کے 537کے معاملے میں یونیورسٹی انتظامیہ نے ایسے طلبا کے خلاف کارروائی کی اور جرمانہ لگایا جس میں شراب، گانجہ جیسی نشیلی چیزوں کااستعمال اور نظم و ضبط کو توڑنے کے 300معاملے شامل ہیں۔اس طرح سے ساڑھے6 سالوں میں اوسطا ہر ماہ تقریبا 7طلبا پر تادیبی کارروائی کی گئی اور جرمانہ عائد کیا گیا۔دہلی کے آر ٹی آئی کارکن گوپال پرساد نے جے این یو انتظامیہ سے 2010کے بعد سے طلبا کے خلاف مختلف مقدمات میں کی گئی کاروائی کی تفصیلات طلب کی تھی ۔ان معاملوں میں نشیلی اشیاء کا استعمال کرکے سیکورٹی اہلکاروں ، ساتھی طلبا وغیرہ کے ساتھ بدسلوکی ، مار پیٹ ، ہنگامہ اور گالم گلوچ کرنے کے واقعات شامل ہیں۔گزشتہ ساڑھے 6سالوں میں ایسے 300معاملے پر جے این یو انتظامیہ نے کارروائی کی ہے۔ان معاملات میں عام طور پر ایک ہزار روپے سے 6 ہزار روپے کا جرمانہ عائد کیا گیا جبکہ 27؍جولائی 2013کو ماہی مانڈوی ہاسٹل کے برآمدے میں شراب پینے کا مجرم پائے جانے پر ایک طالب علم پر 52ہزار روپے کا جرمانہ عائد کیا گیاتھا ۔
9 ؍فروری 2016کے واقعہ کے تناظر میں طالب علم مجیب گٹو کو 2016-17کے مانسون اور سرمائی سیشن کے لیے نکال دیا گیا جبکہ آشوتوش کمار سے مانسون اور سرمائی سیشن کے لیے ہاسٹل کی سہولت واپس لے لی گئی اور 20ہزار روپے کا جرمانہ عائد کیا گیا۔اسی طرح سے طالبہ کومل موہتی سے 21؍جولائی 2016تک کے لیے ہاسٹل کی سہولت واپس لے لی گئی۔طالبہ اوستھی اے نائر، انجلی، انویشا چکرورتی، بھاؤنا ، روبینہ سیفی، شویتا راج ، ایشوریہ ادھیکاری ، گارگی ادھیکار ی ، چنٹو کماری، طالب علم راما ناگا، اننت پرکاش نارائن، ریاض الحق پر 20-20ہزار روپے کا جرمانہ عائد کیا گیا۔اس واقعہ میں جے این یواسٹوڈنٹ یونین کے صدر کنہیا کمار اور سوربھ کمار شرما پر 10-10ہزار روپے کا جرمانہ عائد کیا گیا۔اس معاملے میں بنجیوتسنا لاہڑی(بیرونی طالبہ )اور دروپدی گھوش(بیرونی طالبہ )کا یونیورسٹی میں داخلہ ممنوع کر دیا گیا۔