نئی دہلی،10؍ مارچ (ایس او نیوز؍آئی این ایس انڈیا) دہلی میں سیلنگ سے افراتفری کے درمیان وزیراعلیٰ اروندکجریوال نے وزیر اعظم نریندر مودی کو خط لکھ کر اس کے حل کے لیے قانون بنانے کی درخواست کی ہے۔ واضح رہے کہ لاجپت نگر علاقہ میں جمعرات کو بڑے پیمانے پر سیلنگ کی گئی تھی۔ اس کے بعد وہاں تاجروں نے کام بند کر کے احتجاجی مظاہرہ شروع کردیا۔وزیر اعظم کو لکھے گئے خط میں کجریوال نے کہا ہے کہ دہلی میں آج کل تاجروں کی دکانیں سیل کی جا رہی ہیں۔یہ وہ تاجر ہیں جو ایمانداری کے ساتھ24گھنٹے محنت کرکے اپناکاروبارچلاتے ہیں اور حکومت کو ٹیکس ادا کرتے ہیں۔ یہ بیایمان نہیں ہیں۔ یہ وہ لوگ ہیں جو ملک کی ترقی میں تعاون کرتے ہیں۔وزیراعلیٰ نے لکھاہے کہ قانون میں کچھ خامیاں ہیں اور انہیں دور کرنے کی ذمہ داری مرکزی حکومت کی ہے۔ حکومت نے بروقت ان بے ضابطگیوں کو دور نہیں کیا اور اس کا خمیازہ تاجروں کو بھگتنا پڑ رہا ہے۔ کجریوال نے اپنے خط میں سیلنگ کارروائی روکنے کے لئے فوری طور پر پارلیمنٹ میں قانون بنانے کی مانگ کی ہے۔انہوں نے ایک خط کانگریس صدر راہل گاندھی کو بھی لکھا ہے جس میں دکانوں کی سیلنگ سیلاکھوں لوگوں کی روزی روٹی پر بحران پیدا ہونیکی بات کہی ہے۔ خط میں کانگریس صدر سے سیلنگ کا مسئلہ پارلیمنٹ میں زور شور سے اٹھانے کی اپیل اور مرکزی حکومت کو اس مسئلہ اور بل منظور کرنے کے لیے پابندی عائد کرنیکی بات کہی گئی ہے۔ خط میں وزیر اعلی نے کہا ہے کہ اس معاملے کو سیاست سے اوپر اٹھ کر حل نکالنے کی ضرورت ہے۔ کجریوال نے وزیر اعظم اور کانگریس صدر سے اس معاملے پر بات چیت کرنے کے لئے وقت بھی مانگا ہے۔قابل غور ہے کہ کل دھرنے پر بیٹھے تاجروں سے خطاب کرنے گئے کیجریوال نے خبردار کیا تھا کہ اگر 31 مارچ تک سیلنگ کاحل نہیں نکالا گیا تو وہ بھوک ہڑتال پر بیٹھیں گے۔