کانگریس آئندہ عام انتخابات میں چھتیس گڑھ کی تمام نشست جیتے گی: پنیا
نئی دہلی(ایس او نیوز/آئی این ایس انڈیا)چھتیس گڑھ میں کانگریس نے 90 رکنی اسمبلی میں 68 سیٹیں جیت کر 15 سال بعد اقتدار میں واپسی کی ہے۔ کانگریس کے اس شاندار کارکردگی اور اس سے منسلک کچھ دیگر مسائل پر پارٹی کے چھتیس گڑھ انچارج پی ایل پنیا سے بات کی گئی ،انہوں نے اپنی گفتگو میں کہا کہ ’ یہ جیت بہت بڑی اور تاریخی ہے. اس کا اندازہ ہمیں پہلے ہو گیا تھا کہ عوام کانگریس کو بڑی اکثریت کا ’’تحفہ ‘‘دینے جا رہی ہے‘۔ ہر طبقے نے خاص طور پر کسانوں نوجوانوں، آدی باسی ، پسماندہ اور چھوٹے دکانداروں نے بھرپور حمایت کی۔ کسانوں نے تو دھان فروخت بند کر دیا تھا اور وہ نئی حکومت کا انتظار کر رہے تھے۔ یہی انتخابات سے پہلے کا ایگزٹ پول تھا کہ چھتیس گڑھ میں کانگریس کی حکومت بن رہی ہے۔ ایک سوال کے جواب میں انہوں نے کہا کہ ’’ چھتیس گڑھ چھوٹی ریاست ہے اور لوگ سابق وزیراعلیٰ رمن سنگھ کو ایک چہرے کے طور پر دیکھ رہے تھے؛ لیکن یہ صرف بھرم تھا ۔ دہلی میں بیٹھے ماہرین کو پتہ نہیں تھا کہ رمن سنگھ اور ان کے بیٹے کے بدعنوانی سے عوام نالاں تھے۔ لوگوں اندازہ نہیں تھا کہ عوام نے عزم کرلیا تھا کہ تبدیلی لانی ہے ۔لوگوں میں یہ جذبہ تھا کہ کسی بھی صورت میں تبدیلی لانی ہے ۔ انہوں نے مزید کہا کہ لوگوں نے فیصلہ کیا تھا کہ تبدیلی لانی ہے۔ جب یہ اتحاد بنا تو لوگوں کو لگا کہ یہ اتحاد بی جے پی کو بچانے کے لئے بنا ہے اور اسی دن جوگی اور بی ایس پی پر اعتماد صفر ہوگیا ۔ ان کی نیت پر سوال کھڑا ہوا۔اسی وجہ سے لوگوں نے انہیں مسترد کر دیا۔ ویسے جوگی اب سیاسی طور پر غیر متعلق ہو گئے ہیں ۔انہوں نے مزیدکہا کہ اسمبلی انتخابات کے حساب سے ہم لوک سبھا کی ساری سیٹیں جیت رہے ہیں۔ لوک سبھا انتخابات میں چند ماہ ہی باقی ہیں۔ اب ہماری حکومت بھی وعدوں کے مطابق کام کرے گی۔