پروٹوکول توڑنے میں مودی نے عمران سے مقابلہ کیا، سفارتی ناکامی پر جواب دیں: کانگریس
نئی دہلی، 20 فروری(ایس او نیوز؍آئی این ایس انڈیا) کانگریس نے سعودی عرب کے شہزادہ (ولی عہد) محمد بن سلمان کا پروٹوکول سے الگ جاکرخوش آمدید کئے جانے کو لے کر بدھ کو وزیر اعظم نریندر مودی پر حملہ بولا اور الزام لگایا کہ پروٹوکول توڑنے میں مودی تو گویا پاکستانی وزیر اعظم عمران خان کے ساتھ، جیسے مقابلہ کر رہے ہیں۔پارٹی نے دہشت گرد مسعود اظہر اور جیش محمد پر پابندی کے حوالے سے سعودی عرب کی حمایت نہیں ملنے کو وزیر اعظم مودی کی ’سفارتی ناکامی‘ بھی قرار دیا اور کہا کہ اس پر وزیر اعظم کو ملک کی عوام کو جواب دینا چاہئے۔کانگریس کے سینئر لیڈر آنند شرما نے ٹویٹ کر کہاکہ ایسا لگتا ہے کہ وزیر اعظم مودی سعودی عرب کے شہزادہ محمد بن سلمان کا استقبال کرنے اور پروٹوکول توڑنے میں پاکستانی وزیر اعظم عمران خان کے ساتھ مقابلہ کر رہے ہیں جبکہ اس کی کوئی ضرورت اور جواز نہیں ہے،سب سے زیادہ خراب بات یہ ہے کہ مشترکہ بیان میں جیش محمد اور مسعود اظہر کو محدود کرنے کے تعلق میں کچھ نہیں کہا گیا۔ انہوں نے کہاکہ حقیقت یہ ہے کہ پلوامہ میں ہوئے خطرناک دہشت گردانہ حملے کے بعد سعودی عرب کے شہزادہ نے پاکستان کا دورہ کیا اور مسعود اظہر کو محدود کرنے اور جیش محمد کو دہشت گرد تنظیم قرار دینے کی حمایت کرنے سے انکار کیا۔ شرما نے الزام لگایا کہ یہ واضح طور پر سفارتی ناکامی ہے جس کے لئے وزیر اعظم کو ملک کو جواب دیناچاہیے۔کانگریس کے چیف ترجمان رندیپ سرجیوالا نے بن سلمان اور مودی کے گلے ملنے والی تصاویر اور پاک۔ سعودی مشترکہ بیان کی تحریری رپورٹ کو شیئر کرتے ہوئے ٹویٹ کیاکہ قومی مفاد بمقابلہ مودی جی کی گلے لگنے والی ڈپلومیسی..... پروٹوکول توڑکر اس شخص کا شاندار استقبال کیا جس نے پاکستان کو 20 ارب ڈالر دینے کا وعدہ کیا اور پاکستان کی انسداددہشت گردی کی کوششوں کی تعریف کی۔ انہوں نے وزیر اعظم سے سوال کیاکہ کیا پلوامہ کے شہیدوں کو یاد کرنے کا یہی طریقہ ہے؟۔ سرجیوالا نے کہاکہ مودی جی، کیا آپ سعودی عرب سے کہیں گے کہ وہ پاکستان کے ساتھ جاری اس مشترکہ بیان سے پیچھے ہٹے جس میں مسعود اظہر کو عالمی دہشت گردقراردینے کی ہندوستان کی مانگ کو حقیقت میں مسترد کیا گیا ہے۔ واضح رہے کہ منگل کی رات محمد بن سلمان کی آمد پر وزیر اعظم مودی نے پروٹوکول سے الگ ہٹتے ہوئے خود ان کااستقبال کیا۔سعودی عرب کے شہزادہ ہندوستان کے پہلے دو طرفہ دورے پر آئے ہیں۔اس سے پہلے بن سلمان پاکستان کے دورے پر گئے تھے جہاں دونوں ممالک کے درمیان 20 ارب ڈالر کے معاہدوں پر دستخط کئے گئے تھے۔