مہاگٹھ بندھن برقراررہنے پربوکھلائی بی جے پی ، اسمبلی نہیں چلنے دینے کی دھمکی دے دی
پٹنہ،23؍جولائی(ایس او نیوز؍آئی این ایس انڈیا)بی جے پی بہار میں تیجسوی یادوکے استعفیٰ کولے کر سیاست گرم کرنے کی کوشش میں ہے ۔اب جب کہ اتحادبرقراررہنے کاامکان ہے توبی جے پی کی بے چینی فطری ہے ۔بی جے پی لیڈر سشیل مودی نے استعفیٰ نہ دینے پراسمبلی کی کارروائی نہ چلنے دینے کی دھمکی دے دی ہے ۔حالانکہ بی جے پی ہی مرکزمیں اپوزیشن پرپارلیمنٹ میں تعطل کاالزام لگاتی رہی ہے ۔وہ بھی بہارمیں اسی راستے پرہے ۔واضح ہوکہ دوسرے بی جے پی لیڈران کے خلاف بھی سنگین کیسزہیں لیکن ان کوعہدہ سے ہٹانے کے سوال پربی جے پی خاموش ہیں۔اومابھارتی کے خلاف سپریم کورٹ میں سماعت چل رہی ہے لیکن بی جے پی صاف کرچکی ہے کہ وہ استعفیٰ نہیں دیں گی ۔ایسے میں اپوزیشن الزام گھیرسکتاہے کہ بی جے پی کادوہراپیمانہ کیوں ہے؟۔ بابری مسجد،ویاپم گھوٹالہ سمیت متعددکیسزکئی لیڈران پرہیں اوروہ عہدوں پربراجمان ہیں۔سشیل کمارمودی نے کہاکہ اب بہار کی سیاست میں نائب وزیراعلیٰ تیجسوی یادو کااستعفیٰ یا انہیں عہدے ہٹایا جانا ایک بڑا مسئلہ بن گیاہے۔انہوں نے کہا کہ کوئی داغدار لیڈر کس طرح سی ایم کے پیچھ بیٹھ سکتاہے۔انہوں نے کہا کہ آئندہ اسمبلی سیشن میں بی جے پی اس معاملے کو پورے زور شور سے اٹھانے والی ہے۔سشیل مودی نے بتایاکہ 28جولائی سے شروع ہو رہے اسمبلی سیشن سے ٹھیک پہلے بی جے پی نے بحث کے لیے 26جولائی کو ایک میٹنگ بھی بلائی ہے۔انہوں نے کہا کہ لالو یادو اور ان کے خاندان پر لگے بدعنوانی کے الزامات پرآر جے ڈی کی جانب سے اب تک صفائی نہیں دی گئی ہے جبکہ جے ڈی یو بار بار تیجسوی یادو معاملے پر صفائی مانگ رہی ہے۔اسمبلی سیشن سے پہلے سشیل مودی نے کہا ہے کہ جب تک آر جے ڈی کے رہنماؤں پر لگے بدعنوانی کے الزامات پرصفائی نہیں دیتی ہے تب تک ایوان کی کارروائی نہیں چلنے دی جائے گی۔اتحاد پر نشانہ لگاتے ہوئے سشیل مودی نے کہا کہ کانگریس نے ہمیشہ سے بدعنوان کا ساتھ دیا ہے ایسے میں ان سے کوئی توقع کرنا بیکار ہے۔حکومت کو متنبہ کرتے ہوئے سشیل مودی نے کہا کہ تیجسوی یادوسے معطل کرنے کے علاوہ نتیش کمار کے پاس اور کوئی چارہ نہیں ہے۔ان کاکہناہے کہ آرجے ڈی تیجسوی یادو کو بچانے پر اڑی ہوئی ہے لیکن ان کے خلاف سنگین معاملہ درج ہے اور انہوں نے اب گمنام جائیدادکے معاملے میں صفائی نہیں دی ہے۔