چیف سکریٹری حملہ: سسودیا سے کل ہوگی پوچھ گچھ
نئی دہلی 24 مئی(ایس او نیوز؍ آئی این ایس انڈیا )دہلی کے چیف سیکرٹری پرمبینہ حملہ کیس میں تحقیقات میں شامل ہونے کے لئے رضامندی کے اظہار کے بعد ریاست کے نائب وزیر اعلی منیش سسودیا سے کل پوچھ گچھ کی جائے گی۔ دہلی کے وزیر اعلی اروند کجریوال سے اس معاملے کے سلسلے میں تین گھنٹے سے زیادہ وقت تک پوچھ گچھ کی گئی تھی۔ اس کے بعد کل سسودیا کو تحقیقات میں شامل ہونے کا نوٹس بھیجا گیا ہے۔دہلی پولیس کو بھیجے گئے جواب میں سسودیا نے کہا کہ وہ جمعہ کو ساڑھے چار بجے تحقیقات میں شامل ہوں گے۔دہلی پولیس نے آج بتایا کہ کارروائی کی ویڈیو ریکارڈنگ کی جائے گی۔ایک سینئر پولیس افسر نے بتایا کہ دہلی پولیس کی ایک ٹیم کل سسودیا کے متھرا روڈ واقع رہائش گاہ پر جائے گی۔وزیر اعلیٰ کجریوال کے سرکاری رہائش گاہ پر 19 فروری کے اجلاس کے دوران چیف سکریٹری پر مبینہ طور پر حملہ کیا گیا تھا۔پولیس نے بتایا تھا کہ حملے کے وقت وزیر اعلی اور نائب وزیر اعلی موجود تھے۔ آپ کے دو ممبران اسمبلی امانت اللہ خان اورپرکاش جروال کو اس معاملے میں گرفتار کیا گیا تھا۔