نئی دہلی ،16؍ اکتوبر (ایس او نیوز؍آئی این ایس انڈیا) سی بی آئی نے تہاڑ جیل میں گزشتہ سال ہوئے تشدد معاملے کی تحقیقات اپنے ہاتھوں میں لے لی ہے جس میں 18 قیدیوں کی جیل اہلکاروں نے مبینہ طور پر پٹائی کی تھی۔یہ معلومات حکام نے منگل کو دی۔ایجنسی نے دہلی ہائی کورٹ کے حکم پر اس سلسلے میں دو ایف آئی آردرج کی ہیں۔حکام نے بتایا کہ ہائی کورٹ نے ایجنسی کو جانچ اپنے ہاتھوں میں لینے کا حکم دیا تھا۔عدالت نے وکیل چنمس کنوجیا کی جانب سے دائر پٹیشن پر تحقیقات کا حکم دیا۔کنوجیا نے الزام عائد کیا کہ ان کے موکل شاہد یوسف کی جیل اہلکاروں نے بغیر کسی وجہ کے پٹائی کی۔زیادہ خطرے والے وارڈ نمبر ایک میں 21 نومبر کی رات کو قیدیوں پر ہوئے مبینہ حملے کو ہائی کورٹ نے ’کافی پریشان‘کرنے والا معاملہ قرار دیا تھا۔درخواست میں کہا گیا ہے کہ یوسف سمیت ایک خاص کمیونٹی کو جیل اہلکاروں نے نشانہ بنایا جس میں انہیں اور دیگر قیدیوں کو شدید چوٹیں آئیں۔معاملے کو 22 نومبر کو جب ہائی کورٹ کے نوٹس میں لایا گیا تو عدالت نے اس پر غور کرنے کے لئے ہائی کورٹ کے سینئر عدالتی افسران کی ایک کمیٹی بنائی تھی۔کمیٹی نے اپنی رپورٹ میں کہا تھا کہ قیدیوں کو بغیر کسی مناسب وجہ کے مارا پیٹا گیا۔