نئی دہلی، 14 مارچ(ایس او نیوز؍آئی این ایس انڈیا) دہشت گرد تنظیم جیش محمد کے سرغنہ مسعود اظہر کو عالمی دہشت گرد قرار نہ ہو پانے پر سیاست شروع ہو گئی ہے۔چین کے ویٹو پر کانگریس صدر راہل گاندھی نے مودی حکومت کو گھیرا۔کانگریس کے الزام پر بی جے پی نے جوابی حملہ کیا ہے۔مرکزی وزیر قانون روی شنکر پرساد نے کہا کہ پوری دنیا ہندوستان کے ساتھ ہے، چین کے رویے سے ناخوش ہے،ہندوستان کو جب تکلیف ہوتی ہے تو راہل گاندھی کو خوشی ہوتی ہے۔انہوں نے کہاکہ راہل گاندھی سے میرا سوال ہے کہ 2009 میں یو پی اے کے وقت میں بھی چین نے مسعود اظہر پر یہی ٹیکنیکل ہتھیار لگایا تھا، اس وقت بھی آپ نے ایسا ٹویٹ کیا تھا کیا؟ راہل گاندھی جی کاخود چین کے ساتھ اچھا تعلق ہے۔ایسے میں وہ چین کے ساتھ اپنے تعلقات کا فائدہ اٹھاتے اور مسعود اظہر کو عالمی دہشت گرد قرار کرانے میں مدد کرتے۔

روی شنکر پرساد نے کہا کہ دہشت گرد مسعود اظہر کوعاملی دہشت گرد قرار دینے پر آج چین کے علاوہ پوری دنیا ہندوستان کے ساتھ کھڑی ہے،یہ ایک طرح سے ہندوستان کی سفارتی فتح ہے،کیا مسعود اظہر جیسے ظالمانہ قاتل کے معاملے میں کانگریس کا سر دوسرا ہوگا؟ راہل گاندھی کے ٹویٹ سے ایسا لگتا ہے کہ انہیں اس بات سے خوشی ہے،ہندوستان کو جب بھی تکلیف ہوتی ہے تو راہل خوش کیوں ہوتے ہیں؟۔