سال کے آخر تک ریاست کے ہر گھر میں بجلی پہونچائیں گے:نتیش کمار
پٹنہ:11/ اگست (ایس او نیوز/آئی این ایس انڈیا) بہار کے وزیر اعلیٰ نتیش کمار نے آج دعویٰ کیاکہ بہار کے 17اضلاع میں گھر گھر بجلی پہنچ گئی ہے۔اس سال کے آخر تک تمام اضلاع میں ہر گھر میں بلب جلنے لگے گا۔نتیش کمارنے اعلان کیا کہ اگلے سال مارچ تک ایک ہزار سے زیادہ کاشت کے لیے الگ سے فیڈر پہنچ جائیں گے۔توانائی کے شعبے کی جانب سے بجلی کی عمارت کے احاطے میں منعقد منصوبوں کے سنگ بنیادکی تقریب سے خطاب کرتے ہوئے وزیراعلیٰ نے یہ باتیں کہیں۔نتیش کمار نے کہا کہ بجلی سے بہارمطمئن ہے۔انہوں نے کہاکہ توانائی کے شعبے میں کام تیزی سے چل رہا ہے۔اسے دیکھ کر خوشی ہوتی ہے۔انہوں نے کہاکہ آج سے چھ سال پہلے15اگست کو یوم آزادی کے موقع پر گاندھی میدان میں ہم نے اپنی تقریر کے دوران یہی کہا تھا کہ بجلی کی صورت حال کوبہتر بنانے کی کوشش کر رہے ہیں۔ہم نے بہاروالوں کو واضح کہا تھا اگر بجلی کی صورت حال میں بہتری نہیں لائیں گے پھر ہم2015میں ووٹ مانگنے نہیں جائیں گے۔اس بجلی کے شعبے میں تیزی سے کام ہواہے۔نتیش کمار نے کہا کہ غریب کے گھرایک بلب جلتا تھا اور بل 4000-5000روپے تک پہنچ جاتا تھا۔گزشتہ مالی سال میں بجلی کے بل سے آمدنی 8000 کروڑ ہوئی۔اگر بجلی کمپنیاں خسارے میں رہتی ہیں تو ان کی تلافی ریاستی حکومت اپنے سے گرانٹ میں دیتی ہے۔لیکن پہلے سے کافی کم دینا پڑتاہے۔